Latviya həkimlər cəmiyyətinin vitse-prezidenti, həkim-reanimatoloq, anestezioloq Robert Furmanis “KLUBS” jurnalının saylarından birinin qəhrəmanına çevrilib. Həkim müsahibəsində işi, ailəsi və vətəni Latviyanı necə sevdiyi barədə danışıb. 

Yenixeber.org: Furmanisin söhbətində diqqəti ən çox çəkən məsələ qəbuluna gəlmiş birisinin rus dilində doğum şöbəsini soruşmaq sualına cavab verməkdən imtina etməsi olub. Həkim bunu məhz ona görə edib ki, pasiyent rusca danışıb.

Diqqət edin, bu xəbəri «Sputnik Latviya» agentliyi yayıb. Özəlliyi isə ondadır ki, erməni Marqonun rəhbərlik etdiyi Rusiya agentliyi fəaliyyət göstərdiyi bütün ölkələrdə, o cümlədən, Azərbaycanda KİV kimi yox, məhz Rusiya casus orqanı kimi tanınır.

Furmanisin sözlərinə görə, o, «iliyinə qədər latışdır», hətta üzərində belə yazı olan maykası da var. O, danışıb ki, yaxınlarda Riqadakı “Əzablar” adına xəstəxanada əynində «Rusiya» yazılı futbolka olan bir kişi ona yaxınlaşıb və özünə lazım olan şöbəni tapmaqda kömək istəyib. Sual rus dilində verildiyi üçün həkim «qonaq»la danışmaqdan imtina edib.

«Dünən “Əzablar” xəstəxanasında doğum şöbəsini axtaran bir nəfər mənə yaxınlaşdı. Onun əynində «Rusiya» yazısı olan mayka var idi. Mən, ona dedim: «Günaydın! Bura Latviyadır. Ondan başlayaq ki, latışca danışmalıyıq». O, dönüb getdi» - deyə, həkim danışıb…

Bu epizod ondan xəbər verir ki, rus dili (və ruslar) artıq Rusiya imperializminin girovuna çevrilib. Hətta yaxın qonşuları belə, rusl dilinə də nifrət bəsləməyə başlayıblar. 

Bu istiqamətdə cərəyan edən proseslərin dinamika və miqyasının analizi göstərir ki, lap yaxın gələcəkdə rus dilinə nifrət qlobal xarakter alacaq. Gərəkdir ki, ruslar bunun fərqində olsunlar - Rusiya imperializminə «dur» desinlər…

Mirzə AĞ