Xəbər verildiyi kimi, Birləşmiş Millətlər Təşkilatı Təhlükəsizlik Şurası (BMT TŞ) Dağlıq Qarabağda atəşin dayandırılmasının təminatı üzərində nəzarətin vacibliyi məsələsini müzakirə edib.

Yenixeber.org: Bu barədə oktyabrın 19-da Rusiyanın BMT-dəki daimi nümayəndəsi Vasili Nebenzya xəbər verib.

«İndi atəşin dayandırılmasını təmin etmək lazımdır, bu, ən vacib məsələdir. Belə ki, uyğun razılaşmaya nail olunub, amma ona əməl olunmur. Başlıca məsələ razılaşmanı necə təmin etmək olaraq qalır» - Nebenzya bildirib.

Rusiyalı nümayəndə əlavə edib ki, toplantıdakı məsləhətləşmələrin gedişində, əlbəttə, bu məsələ müzakirə olunub və Şura yanaşmada yetərincə vahid mövqe nümayiş elətdirib.

İndi isə gəlin diqqət yetirək - BMT Təhlükəsizlik Şurası nədənsə Dağlıq Qarabağ bölgəsində hərbi əməliyyatların növbəti dəfə alovlanmasının köklərini görməzliyə vurur, amma atəşin dayandırılmasından ağızdolusu danışır. Belə mövqe isə riyakarlığın kuliminasiyasından başqa bir şey deyil. Əgər BMT gerçəkdən sözügedən münaqişə bölgəsində sabitliyin tərəfdarı olsaydı, ilk növbədə münaqişənin köklərinə nəzər salardı və ötən müddət ərzində onun beynəlxalq qanunlar çərçivəsində həllinə çalışardı. Nə yazıq ki, Quterreşin kontoru bunu etməyib!

Digər tərəfdən, BMT TŞ bu münaqişənin həlli istiqamətində 4 qətnamə qəbul edib, amma qətnamələrin yerinə yetirilməsinin qayğısına qalmayıb, əvəzində isə münaqişəni görünməmiş məkrliliklə ATƏT deyilən «anadangəlmə qısır» bir yığnağa ötürüb. Sonuncu isə münaqişənin dondurulması istiqamətində əlindən gələni edib, başqa sözlə təcavükarın (Ermənistan) başını sığallamaqla vaxt ötürüb. Ötən 26 ildə BMT və ATƏT-in «patronajlığı» altında Ermənistan işğal etdiyi Azərbaycan torpaqlarında yeraltı «beton-şəhələr» salıb…

Sözümün canı odur ki, indi Azərbaycanı atəşkəsə çağırmaq əvəzinə, yaxşı olardı ki, BMT TŞ Ermənistanı 4 qətnaməyə əməl etməyə səsləyəydi - belədə BMT indikindən qat-qat nüzuzlu olardı, bölgədə isə qan su yerinə axmazdı…

Bir məsələnin də üzərinə işıq salmaq gərəkdir. Yazının əvvəlində adını çəkdiyim Nebenzya o şəxsdir ki, Krımın Rusiya tərəfindən ilhaq olunmasından sonra, məsələ BMT TŞ çərçivəsində müzakirə edilərkən indikindən də iyrənc mövqe ortaya qoymuşdu. O zaman Nebenzyanın riyakarlığından danışan Ukrayna nümayəndəsi belə demişdi: «Onun riyakarlığından sadəcə, iyrənirəm! Az qalıram ki, durub onu döyəm…»

Vay dünyanın halına ki, BMT-də Nebenzya kimi riyakarlar otururlar!

Mirzə AĞ