Yenixeber.org: Nəşrin əməkdaşları Ukrayna və ABŞ arasında silah tədarükü ilə bağlı danışıqların gedişi ilə tanış olan 4 nəfərlə danışıblar. Onların fikrincə, Vaşinqton hesab edir ki, ATACMS raketlərinin Kiyevə ötürülməsi Amerika hərbi ehtiyatlarının tükənməsinə gətirib çıxaracaq. Bu da nəticədə ABŞ-ın gələcəkdə mümkün münaqişələrə hazırlığını azaldacaq.

Nəşrin mənbələri qeyd edir ki, Kiyev Amerikanın maliyyə yardımından istifadə edərək, digər ölkələrdən ATACMS-in alınmasına razılıq verilməsini ABŞ-dan xahiş edə bilər. “Politico” Polşa, Cənubi Koreya, Rumıniya, Yunanıstan, Türkiyə, Qətər və Bəhreynin bu raketlərə malik olduğunu yazıb.

Ukrayna hakimiyyəti dəfələrlə ABŞ-dan HIMARS qurğularından buraxıla bilən ATACMS raketlərini tədarük etməyi xahiş edib. Vaşinqton Ukrayna hərbçilərinin Rusiya ərazisinin dərinliklərindəki hədəflərə zərbələr endirəcəyindən, nəticədə müharibənin nəzarətsiz şəkildə genişlənməsinə və ABŞ-ı münaqişəyə sürükləyəcəyindən ehtiyat edərək bu addımı atmaqdan imtina edib.

“The Financial Times” (FT) qəzeti isə öz mənbələrinə istinadla yazır ki, çərşənbə axşamı Brüsseldə NATO müdafiə nazirlərinin Ramştayn formatında Ukrayna ordusuna hərbi yardımına həsr olunmuş iclasında əsas diqqət ordunun döyüş sursatlarının və hava hücumundan müdafiə sistemlərinin təchizatına yönəldiləcək.

Bir gün əvvəl NATO-nun Baş katibi Yens Stoltenberq etiraf etmişdi ki, Ukrayna bloka daxil olan ölkələrin istehsal etdiyi sursatdan daha çox sursat istifadə edir. Rusiya isə hücum zamanı bu həcmlərdən dörd dəfə çox israf edir.

Stoltenberqin fikrincə, NATO ölkələri öz silah ehtiyatlarını artırmalıdır, bu təkcə Ukraynaya kömək etmək üçün deyil, həm də öz anbarlarını doldurmaq üçün vacibdir.

"Bu müharibə hər iki tərəfin böyük miqdarda artilleriya mərmilərindən istifadə etdiyi artilleriya duelinə çevrildi", - adının çəkilməsini istəməyən ABŞ rəsmisi FT-yə deyib. "Beynəlxalq ictimaiyyət Ukraynanı özünü müdafiə etmək üçün lazım olan artilleriya ilə təmin etməyə davam edəcək".

Xatırladaq ki, ATACMS uzaq mənzilli idarə olunan raketlərdir. Onlar 310 kilometrə qədər məsafədəki hədəfləri 1 metr dəqiqliklə vura bilirlər. Son 20 ildə “Lockheed Martin” şirkəti bu raketlərdən 4 minə yaxın istehsal edib. Onların bir hissəsi müttəfiqlərə satılıb, 600-ə yaxını isə İraq və Fars körfəzindəki müharibələr zamanı istifadə olunub. “Azpolitika”