AZ
RU
Ay Allah imdadı səndən istərəm
Baxıram gənclərə üzləri gülmür,
Səfalət içində çulu cırıqdır.
Məzluma dönübdür danışıb dinmir,
Günümüz budursa işlər fırıqdır.
*****
Zamanın gərdişi qaranlıq gecə,
Açılan sabahlar aydın görünmür.
Çaşqındır, yuvanı qursunlar necə,
Fikirlər dağınıq, saydım bölünmür.
*****
Evlənmək istərsə, cavan uşaqlar,
Qəlbinin səsini kimə söyləsin?
Baltaya sap olub cavan qoçaqlar,
Qapılar bağlanır sönür ocaqlar.
*****
İtib etibarı oğlanın qıza,
Düz ilqar yox olub inam qalmayıb.
Deməyək, bir oğlan kormuş baxmayıb?!
Aşiqdir bir oğlan bəlkə yüz qıza.
*****
Səbəblər bir deyil, saymaqla bitməz,
Qızların özüdə ailə qurmayır.
Qızları dinləsən mal- mülk axtarır,
Mizrabda söyləyir simə vurmayır?
*****
Kor olmuş həyanı geri qaytaraq!
Yığılıb bu yola bir işıq tutaq.
Söyləyin; günahı harda axtaraq?
Yetişən gəncliyi necə qurtaraq?
*****
Qız- gəlin evindən qaçaraq itir,
Fırlanıb aləmi Bakıda bitir
Atalar, analar baş edə bilmir.
Xırmanda düyünü " aş" edə bilmir.
*****
Biz hansı zamana dövrə gəlmişik?
Oğludur, qızıdır ata inanmır.
"Dnk" a testinə növbə çəkmişik,
Kişilər qadına daha inanmır.
*****
Bu həyat bizləri hara aparır?
Dərdimiz böyükdür kimə söyləyək!
Yazdıqca içimdən yara qoparır,
İnləsin ney səsi, simə söyləyək.
*****
Ay Allah, imdadı səndən istərəm,
Abırı, həyanı yox edib çəkmə!
Sevdiyim sənikən, inan küsmərəm,
Bir çürük toxumu qəlbimə əkmə!
*****
Bir gənclik yetişsin dinli, imanlı,
Sığınsın əhfinə hidayətilə.
Dili Allah olsun, zehni imanlı,
Dayansın önündə iqaməsilə!
Təranə Şəms. 22. 07. 2025
