Respublika Sanitariya-Karantin Mərkəzi daha bir tenderinə yekun vurub. Məlumata görə, dövlət qurumu xidməti avtomobil olaraq pikap alınmasını həyata keçirəcək.

Yenixeber.org: Belə ki, bununla bağlı Mərkəzlə “TOYOTA”-BAKI MƏRKƏZİ” MMC arasında müqavilə imzalanıb. Respublika Sanitariya-Karantin Mərkəzi bir ədəd avtomobil üçün şirkətə 61 min 200 manat ödəyəcək.

Aparılan  araşdırma zamanı məlum olub ki, 2025-ci ildə Mərkəz daha üç xidməti avtomobil alıb. Onlardan biri 07.04.2025-ci il tarixində reallaşıb. Və “Azərmaş Park” MMC ilə razılaşma əsasında bir ədədə avtomobil sifariş edilib. Bunun üçün şirkətə 31 min 450 manat ödənilib.

İkinci tender isə 26.05.2025-ci il tarixdə keçirilib. Bu dəfə də Mərkəz “AZƏRMAŞ PARK” MMC ilə anlaşıb. İki ədəd avtomobilə görə isə 52 min manat xərcləyib.

Bildirək ki, Respublika Sanitariya-Karantin Mərkəzinin rəhbəri Samir Akif oğlu Musayevdir. O, bir müddət əvvəl rüşvət halları ilə əlaqədar saxlanılan Saleh Novruzini əvəz edib. Belə ki, Baş Prokurorluğun Əməliyyat-axtarış tədbirləri nəticəsində Səhiyyə Nazirliyinin Respublika Sanitariya-Karantin Mərkəzinin baş direktoru Saleh Novruzi, direktor müavini Yadulla Balışov və Laboratoriya şöbəsinin müdiri Tahir Vəliyev cinayət başında yaxalanıblar. İlkin sübutlar əsasında Saleh Novruzi, Yadulla Balışov və Tahir Vəliyev şübhəli şəxs qismində tutularaq Cinayət Məcəlləsinin 311.3.1, 311.3.2, 311.3.3 (qabaqcadan əlbir olan bir qrup şəxs tərəfindən təkrar və külli miqdarda rüşvət alma) və 308.2-ci (ağır nəticələrə səbəb olan vəzifə səlahiyyətlərindən sui-istifadə) maddələri ilə təqsirləndirilən şəxs qismində cəlb ediliblər.(tribunainfo.az)

Qarşı tərəfi də dinləməyə hazırıq.