Belarus mallarının İrana, Küveytə və BƏƏ-yə çatdırılması üçün Azərbaycanla əməkdaşlıq nəzərdən keçirilir.

Yenixeber.org xəbər verir ki, bunu Belarusun logistik operatoru olan “Beltamojservis” müəssisəsinin filial direktoru Marina Belousova Bakıda keçirilən Azərbaycan-Belarus biznes forumu çərçivəsində deyib.

“2025-ci ilin fevral ayından etibarən ‘Beltamojservis’ Belarus Respublikasının uzaq regionlara mal göndərilməsi üzrə pilot layihəsinin iştirakçısına çevrilib. Bu layihə sayəsində mallar Rusiyanın limanları vasitəsilə quru yolla daşınır, ardınca isə dəniz nəqliyyatı ilə dünyanın müxtəlif nöqtələrinə çatdırılır”, - deyə o bildirib.

Onun sözlərinə görə, bu qısa müddətli təcrübə, göndərişlərin necə həyata keçirildiyini və Belarus ixracatçılarının bu sahəyə olan tələbatını daha yaxşı anlamağa imkan verib: "Eyni zamanda, Belarusun ixrac potensialından və yüklərindən istifadə edən ölkələrin də bu prosesə marağı müşahidə olunub".

M. Belousova əlavə edib ki, əsas məhsullar taxta emalı, sellüloz və qida məhsullarıdır: "Belarus Respublikasının ixrac strategiyasının və ‘Beltamojservis’ logistika operatorunun növbəti inkişaf mərhələsi Azərbaycanla əməkdaşlıq olacaq. Biz bunu yalnız ölkələrimizin ticarət potensialının inkişafı kimi deyil, eyni zamanda Belarus məhsullarının İrana, Küveytə və BƏƏ-yə çatdırılması üçün Azərbaycanın nəqliyyat imkanlarını vacib logistika zənciri kimi nəzərdən keçiririk”.