Rumıniyada 6 nəfər Rusiyanın köməyi ilə hökuməti devirməyə cəhddə ittiham olunaraq həbs edilib.

Yenixeber.org: Bu barədə “Azadlıq” radiosunun Rumıniya xidməti məlumat yayıb.

“Onlar siyasi sabitliyi pozmaq və ölkənin müdafiə qabiliyyətini zəiflətməklə Rumıniyanın suverenliyini, müstəqilliyini pozmağa cəhd ediblər”, - məlumatda qeyd olunub.

Müəyyən edilib ki, təqsirləndirilənlərdən beşi hələ 2023-cü ildə cinayətkar qrup yaradıb:

“2024-cü ildə onlara altıncı üzv də qoşulub. Qrup “Vlad Tsepeş” Komandanlığının Baş Qərargahı adlanır. Onun lideri - təqsirləndirilən 6 nəfərdən biri olan 101 yaşlı təqaüdçü general Radu Teodordur. Cinayətkar qrupun üzvləri həm Rumıniyada, həm də Rusiyada yerləşən xarici dövlətin agentləri ilə dəfələrlə əlaqə saxlayıb”.

Prokurorların sözlərinə görə, yanvar ayında iki müttəhim Moskvaya gedib və orada Rumıniyada hakimiyyəti ələ keçirmək cəhdlərinə dəstək vermək istəyən insanlarla görüşüb:

“İstintaq çərçivəsində Rumıniyanın müxtəlif bölgələrində səkkiz axtarış aparılıb. Martın 6-da Buxarest Apellyasiya Məhkəməsinin dörd müttəhimin həbsi, digər ikisinin isə ev dustaqlığı ilə bağlı qərar çıxaracağı gözlənilir”.