Bu paketə uzun mənzilli raketlər ilk dəfə daxil olacaq.

“Yenixeber.org”  Reuters-ə istinadən məlumat verir ki, ABŞ hakimiyyəti Ukraynaya 2,2 milyard dollarlıq yeni hərbi yardım paketi hazırlayır. 

Söhbət 150 km mənzilli GLSDB (Ground Launched Small Diameter Bomb) raketlərinin tədarükündən gedir (hazırda 70 km mənzilli raketlər Ukraynaya çatdırılır).

Ukrayna prezidentinin ofisinin müşaviri Mixail Podolyak bildirib ki, ölkəsi Krımda hədəflərə hücum etməyə imkan verəcək raketlərin tədarükü ilə bağlı danışıqlar aparır. Dekabrda Ukraynanın xarici işlər naziri Dmitri Kuleba 2023-cü ildə ABŞ-ın ATACMS uzaqmənzilli raketlərini Ukraynaya təhvil verəcəyini bildirmişdi. Onların tətbiq diapazonu 300 km-dir.

Noyabrın sonunda Ukrayna 800 km mənzilli raketlərin tədarükü üçün müraciət edib. Ukrayna Milli Təhlükəsizlik və Müdafiə Şurasının katibi Oleksiy Danilov bu raketlərin tədarükü zərurətini enerji sektorundakı problemlərlə izah edib.

Ukrayna hakimiyyəti dəfələrlə ABŞ-dan uzaqmənzilli silahların tədarükü üçün müraciət edib. Ağ Ev ona görə etiraz edir ki, Ukrayna bu raketlərdən Rusiya ərazisinə zərbə endirmək üçün istifadə edə bilər ki, bu da hərbi münaqişəni gərginləşdirər.

 Tərcümə etdi: Səadət Sultan