Redaktor seçimi
Laçın tələsi -
Ağstafa rayon icra başçısı YAP-ın binasının ərazisini satdı –
Məşhur bank soyğunu, cinayətkara vurulan girovlar:
Fars-molla rejiminin güllələdiyi gənclər -
Gömrükdə saxta sənədlərlə yığılan milyonlar kimin cibinə gedir?-
Solovyovun hiddəti, Simonyanın “qeyrəti” və inildəyən əsgərlər – 
Azərbaycan xarici siyasətində yeni istiqamət:
Seymur Talıbovun bacanağı ilə bağlı sensasion iddia -
Günün xəbəri

GƏNCƏ DÖVLƏT UNİVERSİTETİ:İNKİŞAFIN YÜKSƏK MƏRHƏLƏSİNDƏ

                   GƏNCƏ DÖVLƏT UNİVERSİTETİ:

 

Respublikamızda  sayılıb-seçilən, təhsilimizdə xüsusi yeri və çəkisi olan elm ocaqlarından  biri  də  Gəncə  Dövlət  Universitetidir.

Yenixeber.org:  Gözəl  ənənələrə   və   şərəfli tarixə  malik  olan bu universitet ölkəmizə minlərlə ixtisaslı kadrlar vermişdir. Qərb regionunda ən nüfuzlu təhsil ocağı olan Gəncə Dövlət Universiteti  Azərbaycan  təhsilinə  dəyərli  töhfə  verməkdədir.

 Gəncə Dövlət Universiteti 1938-43-cü illərdə 2 illik Müəllimlər İnstitutu, 1943-2000-ci illərdə Pedaqoji İnstitut, 2000-ci ildən isə Universitet kimi fəaliyyət göstərir.Universitetimiz  fəaliyyətə  başladığı  ilk  illərdən  özünün  yüksək  ixtisaslı  pedaqoji  kadr potensialı ilə seçilmiş və bu gün də həmin ənənəni davam etdirir. Universitetin  onlarla pedaqoqu  orden, medallara və diqər dövlət təltiflərinə  layiq  görülmüşdür.Hal-hazırda   universitetdə  8 fakültə,  bir  əlavə təhsil fakültəsi, 13 şöbə fəaliyyət göstərir. Bakalavr  səviyyəsində  əyani  şöbədə 40  ixtisasda  5058, qiyabi  şöbədə 7 ixtisas üzrə  424, magistratura  səviyyəsində isə 306  nəfər olmaqla, bütövlükdə  5788  tələbə təhsil alır.Universitet yüksək keyfiyyətli maddi-texniki bazaya malikdir. Bu ali təhsil müəssisəsinin 5 tədris binası və  tələbə yataqxanası var. Bütün tədris binaları əsaslı təmir olunub və müasir tələblərə cavab verir.

GƏNCƏ DÖVLƏT UNİVERSİTETİ:

Yüksək ixtisaslı mütəxəssislərin hazırlanması üçün  universitetdə  32  laboratoriya, 5 ixtisas  kabineti, 2 tədris emalatxanası, 8 kompüter mərkəzi və geniş auditoriyalar mövcuddur.

Bu göstəricilər isə keyfiyyətli təhsilə imkan yaradır. Məlumdur ki, bu gün Azərbaycan təhsilinə verilən tələb və standartlar dəyişmişdir. Müasir təlim standartları günün tələbidir. Tədrisin keyfiyyətini artırmaq  üçün  universitetdə  innovativ  yanaşmalara  geniş yer verilir. Rektorluğun  təşəbbüsü ilə ötən ildən bu məqsədə xidmət edən yeni layihəyə - "açıq dərs"lərə start verilib. Yeni  layihə istər müəllim heyətinin, istərsə də  pedaqoji  təcrübədə olan tələbələrin "açıq dərs"lərini müntəzəm təşkil etməklə bərabər, həm də onların ictimaiyyət nümayəndələrinin iştirakı ilə keçirilməsi və televiziya vasitəsilə işıqlandırılmasını nəzərdə tutur.

 Universitetdə  semestr  imtahanlarının şəffaflığına nail olmaq üçün imtahanlar test üsulu ilə aparilir.

 GƏNCƏ DÖVLƏT UNİVERSİTETİ:

 Universitet  xarici  beynəlxalq  əlaqələrə  geniş yer verir.  Universiteti tanıdan  və  inkişaf  etdirən  amillərdən  biri də onun beynəlxalq əlaqələridir.

 GDU bu sahədə də bir sıra yeniliklərə imza atıb. 

 

Universitetdə "Elektron universitet" layihəsi reallaşdırılıb. Təhsil sisteminin Boloniya proqramı üzrə qurulması unuversitetimizin Avropa təhsil sisteminə inteqrasiyasını sürətləndirir.Universitetimizdə tədrisin müasir tələblər səviyyəsində qurulması müəllim və tələbə-magistrant kontingentinin  beynəlxalq əlaqələrdə daha fəal və intensiv iştirakına gətirib çıxarır. Universitetimizin onlarla tələbə, magistr və gənc müəllimi öz təhsilini xarici ölkə universitetlərində təkmilləşdirmişdir.Gəncə Dövlət Universiteti Türkiyənin "Mövlana"  mübadilə  proqramına qoşulub. Bu proqram çərçivəsində 20 ali təhsil müəssisəsi ilə, o cümlədən Kastamonu, Giresun, Firat, Ərzurum Teknik, Çankaya, Ərzincan, Nevşəhir Hacı Bektaş Vəli, Bitlis Eren, Aksaray, Uşak, Bozok, Cumhuriyyət, Hacettepe, Ərdahan universitetləri ilə müqavilələr imzalanıb, 10-a yaxın müəllim və tələbənin sənədləri onların komissiyalarına göndərilib.

Məhsəti Gəncəvinin 900 illik yubileyinə həsr olunmuş tədbirlər çərçivəsində Gəncə Dövlət Universiteti  ilə Fransanın Reyms Şampan-Arden Universiteti arasında beynəlxalq əməkdaşlığa dair niyyət protokolu imzalanıb.

Onu da qeyd edək ki, Gəncə Dövlət Universiteti bir neçə istiqamətdə ali məktəblərlə  müqavilələr  bağlayıb. Avropa  istiqamətində  Fransanın Yuxarı Elzas, Strasburq, Reyms Şampan-Arden, Albaniyanın Vitrina, MDB ölkələri istiqamətində Belarusun Vitebsk, İqtisad, Poltava, Gürcüstanın Tbilisi, Kutaisi universitetləri, Özbəkistanın Nizami adına Daşkənd Pedaqoji İnstitutu və Azərbaycanın  Bakı Dövlət Universiteti, Sumqayıt Dövlət Universiteti, Azərbaycan Texniki Universiteti, AMEA Aşqarlar Kimyası, AMEA Kimya Problemləri İnstitutları, Bakı Ali Neft Məktəbi,Azərbaycan Dövlət Neft və Sənaye Universiteti  ilə əməkdaşlıq uğurla davam etdirilir.

 Göründüyü kimi, Gəncə Dövlət Universiteti xarici ölkə ali məktəbləri ilə yanaşı  respublikamızın universitetləri ilə də sıx əməkdaşlığın yaradılmasına xüsusi diqqət yetirir. Növbəti əməkdaşlıq Azərbaycan Dövlət İqtisad Universiteti (UNEC) ilə yaradılmışdır.


GƏNCƏ DÖVLƏT UNİVERSİTETİ:

GƏNCƏ DÖVLƏT UNİVERSİTETİ:

UNEC-in rektoru, professor Ədalət Muradovla GDU-nun rektoru, professor Yusif Yusibovun  imzaladıqları  əməkdaşlıq müqaviləsinə əsasən universitetlər arasında  müəllim və  tələbə mübadiləsinin həyata keçirilməsi, birgə  ikili diplom proqramlarının  reallaşdırılması, elmi-tədqiqat  işlərinin görülməsi və elmi konfransların  təşkili nəzərdə tutulur. Elektron  universitet modeli, informasiya texnologiyaları  sahəsində  əməkdaşlığın   genişləndirilməsi, antiplagiat  sahəsində təcrübə  mübadiləsinin  aparılması, distant  təhsil   müqavilədə  nəzərdə tutulmuşdur.

Gəncə Dövlət Universiteti Bakı şəhərində keçirilən Beynəlxalq təhsil və karyera sərgisində ən yaxşı təqdimata görə I yerə layiq görülüb. 

Universitetimizdə   təhsilin  səviyyəsinə  təsir  edən  ən mühüm amillərdən biri də həm müəllimlərin, həm tələbə və magistrantların elmi-tədqiqat işlərində fəal iştirakıdır. Təkcə bu il GDU əməkdaşlarının Respublikanın nüfuzlu elmi nəşrlərində 350-ə yaxın məqaləsi, xarici ölkələrin elmi nəşrlərində 60-dək elmi məqaləsi dərc edilmişdir,onlarla  dərs vəsaiti,metodik vəsait və monoqrafiyaları çap olunmuşdur.Universitetimizdə elmi konfrans və simpoziumlar keçirilməsi də ənənə halını almışdır.

 GƏNCƏ DÖVLƏT UNİVERSİTETİ:

 II  tədris binasının  həyətində  Gəncə  şəhərində  analoqu olmayan  çox  yüksək keyfiyyətli ot örtüyünə malik mini futbol stadionu yaradılmış, tamaşaçılar üçün oturacaqlar qoyulmuş, stadionun dövrəsində qaçış zolağı, basketbol meydançası da tam hazır vəziyyətə salınıb tələbələrin ixtiyarına verilmişdir.Bundan əlavə tədris ilinin əvvəllərində  İqtisadiyyat və filologiya fakültələrinin yerləşdiyi 4-сü korpus  divarları saxlanılmaqla  tam sökülmüş və  qısa bir müddət ərzində əsaslı şəkildə beynəlxalq standartlara uyğun təmir olunmuşdur.

Azərbaycan Müəllimlər İnstitutunun Gəncə filalı fəaliyyətini dayandırdıqdan sonra Gəncə Dövlət Universitetinin balansına keçirilmiş Cavadbəy Rəfibəyli , 57 ünvanında yerləşən və dörd mərtəbədən ibarət V tədris binasında da əsaslı təmir işləri  başa çatmaq üzrədir.

 GƏNCƏ DÖVLƏT UNİVERSİTETİ:

  

Binada planlı surətdə, tələbata uyğun olaraq seminar, mühazirə otaqları, kabinetlər, kitabxana müəyyənləşdirilmiş, təmir də bu istiqamətdə aparılmışdır. Binanın dam örtüyü mansarda tipində dəyişdirilmiş, otaqlarda istilik sistemi, sanitar qovşaqları yaradılmış, tədris üçün nə lazımsa Avropa standartları səviyyəsində öz real həllini tapmışdır. V tədris binasının əsaslı təmir edilib istifadəyə verilməsi Universitetdə tədrisin keyfiyyətinin yüksəldilməsi üçün lazımi şəraitin yaradılması deməkdir. Otaq baxımından çətinlik çəkən fakültələrdə artıq bu problemə bir dəfəlik son qoyulacaqdır və yaxın  aylarda bu tədris binasının tələbələrin istifadəsinə veriləcəyi planlaşdırılır.

 Bu il Gəncə Dövlət Universitetinin tarixində ilk dəfə olaraq bakalavriat səviyyəsinə 1300  nəfərdən çox  tələbə  qəbul  olmuşdur.Bu tələbələrin  53 nəfəri  500-600 arası, 8 nəfəri isə 600-dən yuxarı  bal toplamışdır. Qəbul planının yerinə yetirilmə faizi 85,45 % təşkil etmişdir.Qəbul  imtahanlarında  respublika  üzrə  ixtisas  seçiminə  görə  Gəncə Dövlət  Universiteti  ilk 5 universitet  arasındadır.

           Universitet yeni informasiya texnologiyaları ilə müvafiq şəkildə təmin edilmiş, ağıllı lövhələr, ağ lövhələr, surətçoxaldan, digər texniki vasitələr alınmış, bütün kafedralar, şöbə və dekanlıqlar və struktur bölmələri kompüterlərlə təchiz olunmuş, tədris  binaları  arasında  fiberoptik  kabellərlə  “Gigabit ethernet ” texnologiyası  vasitəsilə   lokal  şəbəkə  yenilənmiş, yüksəksürətli (15 meqabit) internetə çıxış təmin edilmişdir.Rabitə və Yüksək Texnologiyalar Nazirliyinin dəstəyi ilə Aztelekom tərəfindən korpuslara ”Fiber optic kabel”in çəkilişi uğurla başa çatdırılmışdır.Fasiləsiz  işləyən İnternet  xətti  professor-müəllim  heyəti və tələbələrin operativ informasiya mübadiləsini təmin edir.Tədris prosesinin informasiya texnologiyaları, proqram vəsaitləri, laboratoriya və texniki avadanlıqlarla təminatı Dövlət Təhsil Standartlarına uyğundur.Universitetin onlarla tələbə, magistr və gənc müəllimi öz təhsilini xarici ölkə universitetlərində təkmilləşdirmişdir.

        Universitet tələbələrinin lazımi səviyyədə təhsil almaları ilə bərabər, sağlam insan kimi yetişmələri də rəhbərliyin diqqət mərkəzindədir. Bunun nəticəsidir ki, tələbələrimiz dəfələrlə idmanın müxtəlif növlərində şəhər və  Respublika yarışlarının qalibi, yaxud II, III yerlərə sahib olmuşlar.

       Gəncə Dövlət Universitetinin rektoru professor  Yusif Yusibovun  bir başa təşəbbüsü  ilə Baş  binanın foyesində qoyulan və Ural  mərmərindən böyük sənətkarlıqla yaradılmış Ulu Öndər Heydər Əliyevin büstü bütün kollektiv üçün əvəzsiz hədiyyədir. Bu o deməkdir ki, kollektiv dahi rəhbərin yolu ilə gedir,onun  layiqli davamçısı möhtərəm Prezidentimiz İlham Əliyev cənablarının  siyasətini dəstəkləyir. Bəli, bu gün Azərbaycanın ali təhsil müəssisələri arasında xüsusi yeri və mövqeyi olan Gəncə Dövlət Universiteti son illər geniş inkişaf yoluna düşərək bir sıra diqqətçəkən uğurlara imza atıb. Təsadüfi deyil ki, 2016/2017-ci tədris ilinə tələbə qəbulu zamanı Universitet Respublikanın ali məktəbləri arasında layiqli yerlərdən birinə sahib olub.

 Son illərdə Gəncə Dövlət Universitetinin maddi-texniki bazasının möhkəmləndirilməsində, laboratoriyaların zənginləşdirilməsində, yenidən qurulmasında və  müasir tələblərə cavab verəcək yeni laboratoriyaların yaradılmasında da  əməli işlər görülmüşdür. Artıq Əsas tədris binasında 2 ədəd kimya, 2 ədəd botanika,1 ədəd zoologiya laboratoriyası yenidən qurulmuş , lazımi inventar və avadanlıqlarla təchiz edilmişdir.

Bu günlərdə  qeyri-üzvü sistemlərin fiziki-kimyəvi tədqiqi ilə bağlı elmi-tədqiqat  laboratoriyasının  təntənəli açılışı oldu. Açılışda rektor, professor Yusif Yusibov  yeni yaradılmış elmi-tədqiqat laboratoriyasının  daha  geniş  imkanlara malik  olması  ilə  tədqiqat işlərinin aparılmasında  mühüm  rol  oynayacağını bildirərək  qeyd etdi  ki, təhsili yüksək səviyyəyə  qaldırmaq üçün hər şeydən əvvəl müasir tipli maddi-texniki baza yaratmaq lazımdır. Bu sahədə uğurlu işlər aparılır, bundan  sonra  da məqsədli şəkildə davam etdiriləcəkdir.

Elmi-tədqiqat laboratoriyasının açılışında Gəncə Dövlət Universitetinin “Fəxri doktoru” AMEA-nın akademik M. Nağıyev adına Kataliz və Qeyri-Üzvi Kimya İnstitutunun elmi işlər üzrə direktor müavini, AMEA-nın müxbir üzvü kimya elmləri doktoru, professor, akademik Məhəmməd Babanlı da iştirak etdi  və  Gəncə Dövlət Universitetində son illər görülən işlərdən məmnun qaldığını bildirdi.

Daha bir sevindirici hadisə isə  GRBS şirkətlər qrupunun təşkilatçılığı ilə Gəncə Dövlət Universitetində ilk dəfə olaraq  rəsmi “IELTS” imtahanının  təşkil olunmasıdur.

GRBS və Gəncə Dövlət Universiteti arasında əməkdaşlığa əsasən, universitetdə 2016-cı ildən rəsmi “İELTS” Test Mərkəzi fəaliyyətə başlamışdır , hər ay universitetdə həm rəsmi “İELTS” imtahanı, həm də sınaq imtahanları keçirilməsi nəzərdə tutulmuşdur.Təhsilini xaricdə davam etdirmək istəyən hər bir  şəxs  bu imtahanlarda iştirak etməklə,  istəyini gerçəkləşdirə bilər. “İELTS” nəticələri Avropa, Amerika, Yaxın Şərq və Avstraliyanın öndə gedən ali təhsil müəssisələrində tanınır.

Bundan başqa məlumdur ki, Alman Akademik Mübadilə Xidməti (DAAD) tələbə və elmi  işçilərin  beynəlxalq mübadiləsi ilə məşğul olan dünyanın ən böyük təqaüd təşkilatıdır. Təqaüdlər, Almaniya dövləti tərəfindən tam maliyyələşdirilir.Azərbaycanda  yüksək  səviyyəli  mütəxəssislərin  hazırlanması  ehtiyacını  və  bu  ehtiyacın  Alman  Akademik  Mübadilə   Xidmətinin  (DAAD)  və  onun  üzv universitetlərinin  ödəmək  imkanlarını  nəzərə  alaraq  Azərbaycan  Respublikası Təhsil  Nazirliyi  ilə  Alman  Akademik  Mübadilə   Xidməti  arasında  Azərbaycan tələbələrinin  Almaniyada  təhsili  üzrə  təqaüd  proqramı  ilə  bağlı  sazişə  əsasən 6  ildir ki, Gəncə  Dövlət  Universitetində  yay  kursları  imtahanları  keçirilir. Bu vaxtdadək  GDU-nun  13  tələbəsi  təşkilatın  təqaüdünü  qazanaraq, Almaniyada ixtisasartırma   kurslarına  qatılmışdır  ki, onlardan  4  tələbə  hal-hazırda  öz təhsilini  davam  etdirməkdədir.

Təqaüdü  tələbələrimizə  bir  daha qazandırmaq və  elektron sənədləşmə işlərində yaranmış problemləri aradan qaldırmaq məqsədi ilə DAAD rəhbəri Ştefani Dufauks, akademik müşaviri Rəna Hüseynova ilə birgə 16-17 fevral 2017-ci il tarixdə Gəncə Dövlət Universitetində olmuş və təlimlər keçirmişlər.

Bu  təlimə  Alman  dili  müəllimliyi  ixtisasının  tələbələri  ilə  yanaşı, universitetin  alman dili fənni keçirilən digər fakültələrin tələbəri də fəal şəkildə qatılmışdır. 20 tələbənin qatıldığı inşa imtahanı zamanı Azərbaycan Dövlət Aqrar Universitetindən bir tələbə və Gəncə Dövlət Universitetindən 3 tələbə  B1 və A2 səviyyəsini qazanaraq Almaniyanın müxtəlif şəhərlərində 1 aylıq kurs keçmək üçün Almaniya təşkilatının təqaüdünə layiq görüldülər.

Daha bir sevindirici hadisə   isə  artıq İstanbul Universitetinin YÖS imtahanı səhifəsində yerləşən imtahan mərkəzləri siyahısına Azərbaycanın  Gəncə şəhərinin də   adının  əlavə edilməsidir .

Gəncə  Dövlət  Universitetinin rektoru Professor Yusif  Yusibov  və  İstanbul Universitetinin rektoru Prof. Dr. Mahmut  Ak  həm  Gəncə  Dövlət  Universitetində, həm də İstanbul Universitetində keçirilən görüş zamanı YÖS imtahan mərkəzinin Gəncə şəhərində Gəncə Dövlət Universitetinin nəzdində də təşkil edilməsi ilə bağlı ortaq qərara gəlmişlər. Artıq bu məsələ ilə bağlı işlərə başlanmış və bir çox məsələlər öz həllini tapmışdır.

Gəncə Dövlət Universiteti  bir neçə beynəlxalq layihələrdə tərəfdaş qismində uğurla işini davam etdirir. Avropa İttifaqının “Əlilliyi olan şəxslərin Azərbaycan Ali təhsil müəssisələrinə inteqrasiyasının təməlinin qoyulması”  ESFİDİP-Tempus layihəsini xüsusi qeyd etmək istərdim. Xəzər universitetinin koordinatorluq etdiyi bu layihədə universitetimiz artıq üçüncü ildir ki, tərəfdaş qismində öz işini uğurla davam etdirir. Universitetimizlə yanaşı respublikamızın digər nüfuzlu ali təhsil müəssisələri Xəzər Universiteti (koordinator), Naxçıvan Dövlət Universiteti, Azərbaycan Dövlət İqtisad Universiteti,Sumqayıt Dövlət Universiteti,Lənkəran Dövlət Universiteti və yerli təşkilatlardan  Azərbaycan Respublikası Təhsil Nazirliyi,Əmək və Əhalinini Sosial Müdafiəsi Nazirliyi,Azərbaycan Respublikası Əlil Təşkilatları İttifaqı  da  bu layihədə iştirak edir.

Avropaya inteqrasiya etdiyimiz bir dövrdə məhz beynəlxalq təcrübələrin öyrənilməsi məqsədi ilə layihəyə Avropanın nüfuzlu təhsil müəssisələrindən olan  Avstriya respublikasının  Qraz universiteti,Polşa respublikasının  Lodz universiteti, Yunanstan respublikasının  Makedoniya universiteti,Niderland krallığı Avropa insanlara Məsləhət mərkəzi də cəlb olunmuşdur.

Layihədə başlıca amil  əlilliyi olan tələbələrin ali təhsilə cəlb olunması, onların təhsilinə mane olan məhdudiyyətlərin aradan qaldırılması və həmin tələbələrin cəmiyyətə inteqrasiyasının gücləndirilməsi istiqamətində maarifləndirmə işlərini həyata keçirməkdən ibarətdir.

Məhz bu məqsədlə Qərb bölgəsində yerləşən ali təhsil müəssisələri içərisində məhz qərb bölgəsinin nüfuzlu ali  təhsil müəssisəsi olan Gəncə Dövlət Universiettində “Əlilliyi olan tələbələr üçün mərkəz”  fəaliyyətə başlamışdır.

Bundan başqa Gəncə Dövlət Universitetində  “Dövlət Qulluğuna Hazırlıq Proqramı” çərçivəsində ödənişsiz kurslar təşkil olunub.  Kurslar Dövlət Qulluğu orqanlarında çalışan, professional təcrübəyə malik müəllimlər tərəfindən aparılır. 3 ay müddətində davam edən bu  kurslar zamanı tələbələr qanunvericilk, informasiya texnologiyaları və məntiq üzrə  biliklərini artırır, sınaqlarda iştirak edirlər.

Kursun sonunda tələbələr Azərbaycan Respublikasının Prezidenti yanında Dövlət Qulluğu Məsələləri üzrəKomissiyanın beşinci təsnifata uyğun olan vakant vəzifələrinin tutulması üçün elan etdiyi müsabiqəyə qatılırlar.

Qeyd edək ki, universitetdə ödənişsiz magistraturaya hazırlıq kursları da fəaliyyət göstərir. Eyni zamanda ödənişsiz  xarici dil kurslarının açılması da nəzərdə tutulur.

         Əlbəttə, bu uğurun qazanılmasında müəllim heyətinin gərgin əməyi xüsusilə qeyd edilməlidir. 555 nəfər müəllim heyətindən 17 nəfəri elmlər doktoru,professor;  151 nəfəri dosent; 303 nəfər  fəlsəfə doktoru,baş müəllim    və 84 nəfəri isə müəllimdir. Professor-müəllim heyətindən 2 nəfəri əməkdar elm xadimi, 8 nəfəri əməkdar müəllim, 1 nəfəri əməkdar rəssam, 5 nəfər əməkdar ali məktəb işçisi fəxri adını daşıyır. 7 nəfər isə "Tərəqqi" medalı ilə təltif olunub.

GDU-nun kollektivi Respublikanın və şəhərin ictimai həyatında fəal iştirak edir. Universitetimizin məzunlarının bir çox məsul vəzifələrə irəli çəkilməsi də məhz tələbəlik illərində onlara aşılanan ictimai fəallıq keyfiyyətlərinin parlaq təzahürüdür.

Hazırda GDU-da aparılan məqsədyönlü işlər nəticəsində neqativ halların qarşısı alınmış, tədrisin keyfiyyəti, əmək intizamı yüksəlmiş, universitetdə obyektivlik və şəffaflıq bərqərar olmuşdur.Universitetin rektorlugu, müəllim və tələbə ictimai təşkilatları çalışırlar ki, universitetdə hər bir kəsin əməyi öz layiqli qiymətini alsın. Onlar müəllimlərin də, tələbələrin də mülahizə və təkliflərinə diqqət və qayğı ilə yanaşırlar.

Gəncə Dövlət Universitetinin professor-müəllim heyəti  rektor, professor Yusif  Yusibovun  rəhbərliyi  ilə  son dövrdə bu ali təhsil ocağında gedən quruculuq  işlərini - müəssisənin demokratik prinsiplərə müvafiq idarə olunması, təhsilin keyfiyyətinə nəzarətin gücləndirilməsi, tədris prosesində şəffaflığın təmin olunmasını ürəkdən alqışlayır.

 

 Göründüyü kimi GDU-da inkişaf və fərqlilik göz qabağındadır. Daha yüksək nailiyyətlərə imza atmaq üçün rəhbərlik və pedaqoji heyət yorulmadan uğurlarının sayını daha da artırmağa çalışır. Gəncə Dövlət Universiteti illərlə qazandığı şərəfli  şanlı ənənələrini saxlamaq və yaşatmaqla irəliləyir. Onu hələ qabaqda nə qədər gözəl işlər, yalnız və yalnız uğurlar gözləyir.

GƏNCƏ DÖVLƏT UNİVERSİTETİ:

Elçin Cavadov,

Gəncə Dövlət Universitetinin dosenti,

 

texnika elmləri üzrə fəlsəfə doktoru


Facebook-da paylaş

Yeni xəbərlər

Reklam

Reklam