Yazar Azər Caniyevin yeni kitabı “Sevən ürəklər” çapdan çıxıb.

Yenixeber.org: Kitab iki povestdən – “Ana, biz gəlirik” və “Dəmir adam”dan ibarətdir. Hər iki əsərdə insanın mənəvi aləmi, ailə münasibətləri və sevginin həyatda qurtarıcı rolu təsvir olunur.

“Ana, biz gəlirik” povestində ailə bağlarının gücü, insanın mənəvi dirənişi və sevginin fədakarlıqla birləşməsi poetik dillə təqdim edilir. Müəllif ailə üzvlərinin bir-birinə olan hörmətini və sevgisini cəmiyyət üçün vacib dəyər kimi göstərir.

“Dəmir adam” isə müasir dövrdə pul və tamahın insanları necə dəyişdirdiyini, lakin sevgidən doğan təmizlik və vicdanın bu şərə qalib gələ biləcəyini göstərir. Əsərdə sevgi sadəcə hiss deyil, mənəvi dirənişin rəmzi kimi təqdim olunur.

Azər Caniyev 1954-cü ildə anadan olub, Azərbaycan Xalq Cümhuriyyəti Parlament üzvləri Abdulla bəy və Baba bəy Qabulovların nəslindəndir. Bakı Dövlət Universitetini bitirib, 1988-ci ildən Xalq Hərəkatının fəal iştirakçısıdır. “Tanıtım”, “Vətəndaş Həmrəyliyi” qəzetlərində, “Bakı-Təbriz” jurnalında çalışıb. 2000-ci ildən VHP üzvü, hazırda VHP Ali Məclisinin katibidir.

“Sevən ürəklər” kitabı sevginin, ailənin və vicdanın insan həyatında necə dirçəldici gücə malik olduğunu göstərən dərin mənalı bir ədəbi əsərdir.