Futbol üzrə Azərbaycan millisi Malta və Latviya ilə yoldaşlıq oyunları öncəsi Bakıda son məşqinə çıxıb.

Yenixeber.org: Bakı Olimpiya Stadionunda (BOS) baş tutan hazırlıq prosesində yığmaya dəvət almış 25 futbolçudan 22-si iştirak edib.

Almaniyanın "Ertsgebirge" klubunun yarımmüdafiəçisi Dmitri Nazarov və Portuqaliyanın "Tondela" klubunda çıxış edən Renat Dadaşov komandanın düşərgəsinə Maltada qoşulacaq. Türkiyə "Bursaspor"unun oyunçusu Namik Ələskərov isə zədədən əziyyət çəkdiyi üçün məşqlərə qatılmayıb. Onun yoldaşlıq görüşlərində iştirakı sual altındadır.

Media nümayəndələri üçün ilk 15 dəqiqəsi açıq məşqi AFFA-nın icraçı vitse-prezidenti Elxan Məmmədov və qurumun yeni baş katibi Sərxan Hacıyev də izləyib. Məşqdən öncə E.Məmmədov Hacıyevi yığma üzvlərinə təqdim edib.

Həmçinin milli komanda BOS-dakı hazırlığa yeni məşqçi ilə çıxıb. Yığmanın sabiq qapıçısı Kamran Ağayev baş məşqçi Canni De Byazinin köməkçisi təyin olunub. O, yığmada qapıçılar üzrə məşqçi funksiyasını yerinə yetirəcək.

Qeyd edək ki, Azərbaycan millisi martın 25-də Malta, 29-da isə Latviya ilə qarşılaşacaq. Hər iki görüş Maltada baş tutacaq.