Məktubda deyilir.
Biz, Ucar rayonunun bir qrup sakini olaraq, rayon ərazisində baş verən ciddi qanunsuzluq və talançılıq halları ilə bağlı ictimaiyyəti məlumatlandırmaq zərurəti hiss edirik.
Son bir ay ərzində Ucar Su Meliorasiya Sistemlərinin İstismarı İdarəsi tərəfindən 552 metrdən çox uzunluğa malik, böyük diametrli su boruları qanunsuz şəkildə yerdən qazılaraq çıxarılıb və satılıb. Əldə etdiyimiz məlumata görə, həmin borular bu idarənin balansında deyil və onların satılması tamamilə qanunsuzdur. Bu, açıq-aşkar dövlət əmlakının mənimsənilməsi və vəzifə səlahiyyətlərindən sui-istifadə halıdır.
Ən narahatedici məqam isə odur ki, bu qanunsuz əməliyyatları həyata keçirən şəxslər — idarənin müdiri Müşfiq Məmmədov və onun müavini Zaur Əzizov cəzasızlıq mühiti içində daha da azğınlaşaraq sakinlərə məxsus su və kanalizasiya borularına da göz dikə bilərlər. Bu faktlar Ucar sakinlərini ciddi narahat edir.
Xüsusi olaraq qeyd etmək istəyirik ki, Müşfiq Məmmədov, Ucar Rayon İcra Hakimiyyətinin başçısı Mənsur Məmmədovun doğma qardaşıdır. Bu səbəbdən onun məsuliyyətdən yayınması və toxunulmazlıq mühiti yaradılması ilə bağlı şübhələrimiz artmaqdadır.
Sonuncu belə qanunsuz əməliyyat Məlikballı Qurban küçəsi ilə üzbəüz yerləşən yaşayış binasının ərazisində həyata keçirilib. Bu fakt çoxsaylı şahid ifadələri və vizual sübutlarla təsdiqlənir.
Ucar Su Meliorasiya Sistemlərinin İstismarı İdarəsinə məxsus texnikalar pullu, şəxsi işlərə cəlb edilir.Ancaq kəndlərdə su kanalları lildən, qamışdan və kol-kosdan qətiyyən təmizlənilmir. 100-200 metr məsafədə aparılan təmizlik işləri üçün tərtib edilmiş. sənədlərdə bu rəqəmi 100 dəfə şişirdib ayrılan vəsaiti talan edirlər.
Biz, Ucar sakinləri olaraq, Azərbaycan Respublikasının Baş Prokurorluğu yanında Korrupsiyaya Qarşı Mübarizə Baş İdarəsindən bu məsələni ciddi və obyektiv şəkildə araşdırmağı, eləcə də vəzifə səlahiyyətlərindən sui-istifadə edən şəxslərin qanun qarşısında cavab verməsini təmin etməyi tələb edirik.
Bu cür hallar nəinki vətəndaşların əmlak və təhlükəsizlik hüquqlarına təhdiddir, eyni zamanda dövlətin nüfuzuna və qanunun aliliyinə açıq hörmətsizlikdir. Məsuliyyətli və şəffaf media nümayəndələrindən bu məsələyə diqqət ayırmağı və ictimailəşdirməklə bizə dəstək göstərməyi xahiş edirik.