Yenixeber.org: Bu sözləri sabiq deputat, hüquqşunas Çingiz Qənizadə söyləyib. O, narkotiklə mübarizədə əvvəlki illərdə çox səhvlər olduğunu qeyd edib:

“Bizim yanaşmamızda əvvəldən səhvlər var idi. Getdikcə bu problem böyüdü. Artıq internet üzərindən narkotik satışına başlanılıb. Vəziyyətin ciddiliyini görən hüquq mühafizə orqanları hərəkətə keçib, narkotacirlər saxlanılır.

Bir məsələni diqqətə çatdırım ki, narkotacirlərin həbsləri zamanı qanunsuzluğa yol verilməməlidir. Hazırda kütləvi həbslər gedir. Bəzən plan doldurmaq üçün müəyyən şəxsləri əsasları olmadan məsuliyyətə cəlb etməyə çalışırlar və məhkəmə ilə istintaq orqanları arasında ziddiyətlər yaranır. Narkotiklə mübarizə məsələsində tam dolğun və kifayət qədər faktlara əsaslanan mübarizə aparılmalıdır”.

Hüquqşunas narkotik maddələrin hazırlanması üçün xaricdən mütəxəssislərin gəldiyini bildirib:

““Patı” süni şəkildə əldə olunan narkotik vasitədir. Bəzi mənbələrdən aldığım məlumatlara görə bu maddə həm ölkəmizə daşınır həm də ölkə daxilində xaricdən gələn mütəxəssislər tərəfindən kiçik sexlərdə istehsal olunur. Məlumatın nə dərəcədə doğru olduğunu bilmirik, yəqin ki, hüquq mühafizə orqanları bununla bağlı açıqlama verəcək. 

Narkotiki satanlardan daha çox alanların, xaricdən gətirənlərin zərərsizləşdirilməsi ilə məşğul olmaq lazımdır. Bu problem yalnız Azərbaycanda deyil, dünyanın bütün ölkələrində var. Qanunsuz narkotik ticarəti ilə məşğul olaraq milyonlarla, milyardlarla gəlir əldə etmək bacarığına malik olan yaramaz şəbəkə sahibi olan insanlar var. Onlar çalışırlar ki, istifadəçilərin sayı artsın. Çox qorxulu haldır”.

Ç.Qənizadə gənclərimiz haqqında da danışıb: “Müasir dövrdə gənclərimizin sərbəstliyi, müəyyən ictimai yerlərdə diskoteka və barların çoxluğu, ən əsası övladlar üzərində nəzarətsizlik onların pis yollara düşməsinə səbəb olur. Yalnız hüquq mühafizə orqanları deyil, valideynlərdə övladlarını daimi nəzarətdə saxlamalıdır. Yalnız polisə arxayın olsaq, uğurlu nəticə əldə edə bilmərik”.