Böyük Britaniyada təcili yardım işçiləri genişmiqyaslı tətillərə qoşulub.

Yenixeber.org: Ölkədə yüksək inflyasiya fonunda işçilər maaşların artırılmasını tələb edirlər.

“Biz sadəcə hökumətin danışıqlar masasına qayıtmasını və bizimlə danışmasını istəyirik”, –  həmkarlar ittifaqının sözçüsü Naycel Bisli bildirib.

Məlumata görə, bazar ertəsi keçiriləcək tətildə təxminən 11 min nəfər iştirak edəcək. Onlar illik 10,1%-ə çatan inflyasiyaya uyğun olaraq əmək haqqının artırılmasını tələb edirlər.

Qeyd edək ki, inflyasiyanın kəskin artması, əhalinin real gəlirlərinin və həyat səviyyəsinin aşağı düşməsi nəticəsində yaranan genişmiqyaslı tətil dalğası ötən ilin sonunda Böyük Britaniyanı bürüyüb. Tətillərdə tibb işçiləri, dəmiryolçular, poçtalyonlar, məktəb və ali məktəblərin müəllimləri, gömrükçülər, bir sıra başqa peşələrin nümayəndələri iştirak edirlər.

Britaniya hakimiyyəti dəfələrlə bəyan edib ki, dövlət sektorunda işləyənlərin maaşlarını inflyasiyaya uyğun olaraq qaldıra bilməzlər, çünki bu cür tədbirlər ölkədə qiymətlərin daha da artmasına səbəb olacaq və büdcəyə əsassız yük yaradacaq.