Görəsən Rusiya Prezidenti Vladimir Putin müxalif siyasətçi, “Yabloko” partiyasının qurucusu Qriqori Yavlinski ilə Kremldə məxfi görüşə niyə ehtiyac duyub?

Yenixeber.org: Mövzu ilə bağlı açıqlamasında politoloq Elxan Şahinoğlu Yavlinskini liberal görüşlü siyasətçi olduğunu xatırladıb.

“O, Rusiyanın Ukraynaya qarşı işğalçı müharibəsinin qəti əleyhdarıdır. Putinin əks fikirdə olan siyasətçi ilə müzakirəyə ehtiyac duymasının konkret səbəbi olmalıdır. Fikrimcə, Kreml sahibi müharibənin dayanıqlı hal almasının hər iki tərəfdən itkiləri daha da artıracağının fərqindədir. Ukrayna müharibəni davam etdirmək üçün daima Qərbdən maliyyə və hərbi texnika almalıdır. Ancaq Qərbdə də Rusiya-Ukrayna müharibəsindən yorğunluq əmələ gəlib. Belə vəziyyətdə Ukrayna və Rusiya masaya qayıtmaq barədə düşünməlidirlər. Ukraynanın Baş Qərargah rəisi Zalujnı da son məqaləsində müharibənin davam etdirilməsinin çətinliyinə işarə edib”, - politoloq vurğulayıb.

E.Şahinoğlunun fikrincə, Putin Yavlinski ilə görüşməklə daxili və xarici auditoriyaya mesaj verib ki, o, Ukrayna ilə danışıqlara başlamaq variantını nəzərdən keçirir:

“Putinin Yavlinski ilə görüşdə maraqlı olması həm də Kreml sahibinin Ukraynaya dəstəkdən yorulan Qərbə mesajdır ki, mən danışıqlara hazıram, siz də danışıqlar istəyirsinizsə, Kiyevi razı salmalısınız. Ancaq orası da var ki, Kiyevin danışıqlara razılaşması işğalı qeyri-müəyyən müddətə dondurması ilə nəticələnəcək. Putinə də elə bu lazımdır”.(Axar)