Fransanın 2014-cü ildən bəri Sahel ölkələrində (Eritreya, Seneqal, Mavritaniya, Mali, Burkina-Faso, Niger, Nigeriya, Çad və Sudan) həyata keçirdiyi əməliyyatları dayandıraraq, hərbi qüvvələrinin ən azı 40 faizini geri çəkmək qərarından sonra bölgədə yaranan boşluğu Türkiyə doldurmağa başlayıb.

Yenixeber.org: Bu haqda Fransanın “Le Monde” qəzeti yazıb.

Məqalə müəllifi Türkiyənin Afrikadakı nüfuzunu yalnız ticarət maraqları üçün genişləndirmədiyini yazıb və qeyd edib ki, proseslərin inkişafına və imzalanan anlaşmalara baxdıqda Ankaranın bölgədə oyun dəyişdirən güc kimi önə çıxdığını görmək mümkündür.

Nəşr bildirib ki, Türkiyə ötən il Nigerlə imzaladığı hərbi müqavilədən sonra bölgədə Fransanın önünə daha güclü oyunçu kimi çıxır. Malidəki dövlət çevrilişindən sonra bu ölkədə də Fransaya qarşı başlayan diplomatik gəlişmələr Paris-Ankara münasibətlərində dönüş nöqtəsi hesab olunur.

Məqalə müəllifi Fransanın Sahel bölgəsindən hərbi qüvvələrini çıxarmasının yaratdığı boşluq uzun illərdir bölgə ölkələrinin inkişafı üçün humanitar yardım, yenidənqurma və dini bağlarla hücuma keçən Türkiyə üçün fürsət yaratdığını bildirib. Müəllifə görə, Türkiyə qlobal oyunçu olaraq qitə xalqlarının gözündə Avropa, Rusiya və Çindən daha yaxşı mövqedədir.