Yenixeber.org: O, Azərbaycandakı idarəçilik sistemindən danışarkən Rusiyanın nəzarətində olan "beşinci kolon"un dağıdıcı fəaliyyətindən misallar gətirib, adlar çəkib. Çöhrəqanlı Prezident Administrasiyasının keçmiş rəhbəri Ramiz Mehdiyevi və keçmiş Baş Qərərgah rəisi Nəcməddin Sadıkovu "Rusiyanın kölələri" adlandırıb.

Xatırladaq ki, son illər "beşinci kolon"un Azərbaycanın daxili və xarici siyasətinə təsirləri, şəbəkələşmiş anti-milli qüvvələrin ortaq fəaliyyəti ilə bağlı cəmiyyətdə geniş diskusiyalar gedir. 2018-ci ildən başlayaraq, bu şəbəkənin önəmli isimləri hakimiyyət postlarından qovulub, onların tapşırıqlarını icra edən yüksək vəzifəli məmurlar isə həbs edilib.

Çöhrəqanlının dedikləri "beşinci kolon"a qarşı mübarizəni yenidən gündəmə daşıyıb.

Bu barədə ardıcıl çıxışları ilə fərqlənən Azərbaycan Demokrat Partiyasının sədri Sərdar Cəlaloğlu "AzPolitika.info"ya bildirib ki, sözügedən şəbəkə ilk növbədə ölkədə özəlləşmə adı altında iqtisadi sabotaj həyata keçirdi. 

"Nəticədə müqavimət gücü olan məhsuldar qüvvələr ölkəni tərk etdi, iqtisadiyyat dağıldı, böyük işsizlər ordusu yarandı, sosial problemlər artdı. İqtidar-müxalifət münasibətləri də düşmənçilik həddinə çıxdı, həbslər aparıldı. Nəticədə, xalq-hakimiyyət, müxalifət-hakimiyyət münasibətlərində uçurum yaradıldı", - partiya sədri xatırladır.

ADP sədrinin sözlərinə görə, Rusiyanın xüsusi xidmət orqanları Azərbaycanda müəyyən rəhbər orqanlarda çalışan adamları öz təsirlərinə salmaqla, onların vasitəsi ilə müəyyən tapşırıqların, ideyaların həyata keçirilməsinə nail olublar: "Onlar Rusiya hərbi kəşfiyyatının, Müdafiə Nazirliyinin, Daxili İşlər Nazirliyinin agentləridir".

Sərdar Cəlaloğlu bildirib ki, "beşinci kolon"un strukturlaşmış fəaliyyəti zəiflədilsə də, hazırda da mövcuddur. Onun sözlərinə görə, Azərbaycanın xarici siyasətində Rusiyadan uzaqlaşma kursu davam etdirildikcə onların təsiri də azalmağa başlayacaq.

ADP sədri deyir ki, ölkədə həmin şəbəkəyə qarşı mübarizə davam etdirilir: "Korrupsiyaya qarşı mübarizə və başqa müxtəlif adlar altında keçirilən tədbirlərlə Rusiyaya xidmət edən qüvvələr təmizlənir".

Bəs, hazırda bu şəbəkədən Azərbaycana qarşı hansısa təhlükə qalırmı? 

Sərdar Cəlaloğlu hesab edir ki, təhlükələr var: "Hakimiyyəti devirməyə, ölkədə təxribatlar törətməyə çalışa bilərlər. Hazırda Türkiyə də regionda güclüdür, situasiyaya nəzarət edir, ona görə də hesab edirəm ki, real təhlükə yoxdur".

Perspektivə gəlincə, S.Cəlaloğlu nikbindir, deyir ki, Azərbaycan Rusiyadan uzaqlaşdıqca "beşinci kolon"un ölkəyə təsir imkanları da azalacaq.