Noyabrın 12-də Azərbaycan Ordusunun vurduğu hərbi vertolyotda ölən ekipaj üzvlərinin dəfni sabah keçiriləcək.

   "Xeberinfo.com": Tert.am saytının məlumatına görə, bu barədə Ermənistan Müdafiə Nazirliyindən bildiriblər. Mərasim kilsədə olacaq, amma mənbə bildirib ki, hansı kilsədə olacağı dəqiqləşməyib.

Ermənistan tərəfi bəyan edir ki, bir ekipaj üzvünün cəsədini, ikisinin cəsədinin qalıqlarını “xüsusi əməliyyat nəticəsində Azərbaycan Ordusunun intensiv atəşi altında olan” hadisə yerindən götürə bilib. Ermənistanda “gözəgörünməz” bu əməliyyat barədə məlumat bayram əhval-ruhiyyəsində qarşılanıb.

Lakin Azərbaycan Müdafiə Nazirliyi vurulmuş vertolyotun qalıqları olan ərazidə hər hansı əməliyyat keçirildiyini təkzib edir.

İki gün ərzində Ermənistan Müdafiə Nazirliyi cəsədlərin götürüldüyünə dair heç bir sübut təqdim etməyib. Təqdim olunan videokadrlarda isə bir erməni hərbçisinin cəsədi görünsə də, onun üzü bağlanır.

Azərbaycan Müdafiə Nazirliyi hələ ki, Ermənistan hərbi rəhbərliyinin yeni bəyanatlarını şərh etməyib.

Bu baxımdan, ermənilərin sabaha planlaşdırılan dəfn mərasimində kimi və ya nəyi dəfn edəcəkləri maraqlıdır. İstisna deyil ki, vertolyotun vurularaq yanması nəticəsində cəsədlərin onsuz da yandığını düşünən Ermənistanın hərbi-siyasi rəhbərliyi, həm öz cəmiyyətlərinə müəyyən qədər təskinlik vermək, həm də Azərbaycan Ordusunda çaşqınlıq yaratmaq üçün “xüsusi əməliyyat” oyununu uydurublar və yalançı dəfn mərasimi keçirmək niyyətindədirlər.