İranın BMT-dəki səfiri: "ABŞ təzyiq siyasətindən əl çəkməlidir"
“ABŞ Prezidentinin Milli Təhlükəsizlik məsələləri üzrə müşaviri Con Boltonun vəzifəsindən azad edilməsi Vaşinqtonla Tehran arasında danışıqların bərpasına kömək etməyəcək”.
Yenixeber.org: Bu barədə İranın BMT-dəki səfiri Məcid Təxte Rəvançi deyib.
O bildirib ki, C. Boltonun ABŞ Prezidenti Donald Tramp administrasiyasından getməsi, İranı ABŞ-la müzakirələrə yenidən baxmağa vadar etməyəcək.
Səfirin sözlərinə görə, İrana qarşı sanksiyaların qüvvədə olduğu müddətdə ABŞ-la danışıqlar aparılmayacaq.
“ABŞ İrana qarşı maksimum təzyiq siyasətindən əl çəkməlidir. İranın nüvə sazişindəki öhdəlikləri digər tərəflərlə mütənasibdir, əgər lazım gələrsə, biz əlavə addımlar atacağıq”, – deyə Məcid Təxte-Rəvançi vurğulayıb.
Qeyd edək ki, ötən gün ABŞ Prezidenti Donald Tramp xidmətlərinin artıq lazım olmadığını söyləyərək, Milli Təhlükəsizlik məsələləri üzrə müşaviri Con Boltonu vəzifəsindən azad edib.
