Yenixeber.org: Bunu Ukrayna Prezident Ofisi rəhbərinin müşaviri Aleksey Arestoviç efirdə rusiyalı hüquq müdafiəçisi Mark Feyqinlə söhbət edərkən deyib.

“Putin yalnız təhlükəsiz bölgələrə səfər edir. DTK-da gözünü qırpmadan tapşırıqları yerinə yetirən, güllə altında döyüşməyi bacaran insanlar var idi. Lakin Putin o adamlardan deyildi. O, heç vaxt DTK-da riskli tapşırıqlarda iştirak etməyib. Sobçakın yanında olub, əmrlər verib, Litvinenkonu və digərlərini bunkerdən öldürdürüb və s. Əlbəttə, bu əməliyyatlar xüsusi bir risk tələb etmir”, – Arestoviç bildirib.

Onun sözlərinə görə, Putin cəbhə xəttinə mümkün səfərlər zamanı ukraynalılardan yox, öz ətrafındakı adamlardan qorxur: “O, Ukraynadan daha çox ətrafındakı mühafizəçilərindən, ofisiantlarından, katibələrindən, və ən əsası, həkimlərindən qorxur. Bir sözlə, o, hamıdan qorxur və bu qorxu içində yaşayır. Belə bir deyim var: “Nə qədər çox pislik edirsənsə və buna niyyətin olursa, bir o qədər çox insanlığını itirirsən”. Bu, çox sadə bir qanundur. Hətta qaranlıq bir qəbiristanlıqda mini ətəkdə gəzən qız da qorxur. Çünki o, bu cür geyinməklə potensial zorakılığa və özünə hücuma şərait yaradır. Bu, psixologiyadır. Putin nüvə çətirinin altında oturub əmrlər versə də, etdiklərinə görə öldürülməkdən qorxur”.

Arestoviç qeyd edib ki, Putin cəbhə bölgəsinə gedərsə, rus hərbçiləri öz prezidentlərini görüb, qorxuya düşə bilərlər: “İstəyirsən ki, o, cəbhə xəttində harasa getsin və bununla əsgərlərini ruhlandırsın? Əmin ol ki, Putin ora getsə, onlar komandirlərinin əslində kim olduğunu görəcəklər. Onu görüb dəhşətə gələcəklər. Məyus olacaqlar. Putini rus əsgərlərinə göstərsən, o zaman rus ordusu nəinki qaçacaq, hətta özünü belə güllələyəcək...”