Hindistan hökuməti Azərbaycan ordusunun 44 günlük Qarabağ müharibəsindəki təcrübəsini təhlil edərək ABŞ-dan daha əvvəl sifariş verdiyi pilotsuz təyyarələrin sayını artırıb.

Yenixeber.org: Xarici KİV-lər xəbər verir ki, ABŞ-ın “General Atomics” şirkəti ilə danışıqlar aparan rəsmi Dehli bu şirkətdən 3 milyard dollara 30 ədəd MQ-9 Reaper döyüş pilotsuz təyyarələri almağı planlaşdırır.

Bu pilotsuz təyyarələrin alınmasına dair ilkin razılaşma hələ 2017-ci ildə Hindistan baş naziri Narendra Modi ilə ABŞ-ın o vaxtkı prezidenti Donald Tramp arasında danışıqlarda əldə edilmişdi. O zaman Hindistan tərəfi 22 ədəd MQ-9 Reaper almaq niyyətini ifadə etmidi. Lakin indi Qarabağ müharibəsinin ardınca Hindistan ordusu pilotsuz döyüş təyyarələrinin müasir münaqişələrdəki rolunu nəzərə alaraq onların sayını 30-a qaldırmağı qərara alıb. Plana görə Hindistan hərbi hava, dəniz və quru qüvvələrinin hər birinə 10 MQ-9 Reaper olmaqla cəmi 30 ədəd belə təyyarə alacaq.

MQ-9 həm döyüş, həm kəşfiyyat məqsədi ilə istifadə edilən, uzun müddətə havada qala bilən və orta hündürlüklərdə uçan pilotsuz təyyarədir. Maksimal qalxma hündürlüyü 15 kilometrdir, normal uçuş hündürlüyü isə 7.5 kilometrdir. Normal uçuş sürəti saatda 313 kilometr təşkil edir. 4800 kiloqrama yaxın faydalı yük daşıyır. Tam döyüş təchizatı ilə havada 14 saat qala, 2 min kilometrə yaxın məsafə qət edə bilir.

Xatırladaq ki, Hindistan ordusunun komandanlığı 44 günlük Qarabağ müharibəsinin ardınca Azərbaycan ordusunun döyüş təcrübəsini təhlil etməyə başlamışdı. Ordunun Baş qərargahı bildirmişdi ki, bu müharibə müasir münaqişələrdə silahlı pilotsuz aparatların rolunu ortaya qoyur və deməli silahlanma konsepsiyasında dəyişiklik edilməlidir. Hindistanın Pakistan və Çinlə sərhəd münaqişələri mövcuddur.