Ta sovet hakimiyyəti illərində qabaqcıl məhsul becərən rayonlardan biri də İmişli idi. Həm torpaq yetişdirirdi, həm sakinləri.

Yenixeber.org: Nəinki İmişli, ümumiyyətlə aran camaatı zəhmətkeş, çalışqan camaatdır. Amma, o qədər çalışıb-çarpışmanın qarşılığında, özləri demişkən, "nə əldə var, nə ovucda"...

İlk baxışdan "kasıb rayon" təsiri bağışlasa da 5-6 nəfər tərəfindən bölüşdürülən İmişli rayonu heç də göründüyü kimi deyil. Məsələn "Hacı Tofiq" kimi tanınan Tofiq İsayev, 8 saylı vergilər ərazi idarəsinin keçmiş rəisi Elçin Kazımov, Yasəf Hüseynov, Aslan Manafov, Yusif və Fərhad Ağayev qardaşları arasında "ata mülkü" kimi bölüşdürülüb. Keçmiş millət vəkili Əsabil Qasımov və Hidroqovşaq rəisi Mirqoca Mirişov da bu "mülkün" "mülkədar"larından - yəni "şərikləri"ndən sayılırlar.

"Rayonda ən çox mülk sahibi kim olacaq" deyə, sanki, biri-biri ilə "yarışa girən " bu şəxslərə "ev sahibliyi" edən İcra başçısı Elçin Rzayev isə yerli saytların bildirdiyinə görə öz yaxınlarını - ailə üzvlərini, həmçinin mülkədarlardan bəzilərinin yaxın adamlarını başına yığıb, o da dövlət idarəsini öz mülkü kimi idarə edir.

Belə ki, əldə etdiyimiz məlumata görə, bu yaxınlarda Azərbaycan Respublikası CM-nin 178.2.2-ci maddəsi ilə ittiham olunmuş, ayağında “bilərzik” (elektron nəzarət vasitəsi) gəzdirən Səmədov Sahib Mehralı oğlunu İmişli Kommunal Məssisələr Birliyinə rəhbər təyin edib.

Belə olan halda isə Elçin Rzayevin vəzifəsindən öz mənafeyi naminə sui-istifadə etdiyi özünü aşkar büruzə verir.

İmişli sakinlərideyir ki, "Gedirik problemimizi deyirik, Elçin Rzayev deyir, "Mən rüşvət almıram, sənə kömək edə bilim".

Rüşvət almayan Rayon Rəhbəri maraqlıdır, hansı səbəblərdən yuxarıda adlarını çəkdiyimiz şəxslərin rayonu bölüşdürmələrinə göz yumur?

İcra Hakimiyyəti binasının düz qarşısında, Heydər Əliyev parkındakı obyektlərin, parkın düz yanında tikintisi yarım qalmış otelin və digər bir neçə obyektlərin sahibi Tofiq İsayev bütün bunlar üçün icazəni necə alıb?

Bir halda ki, İcra Hakimiyyəti şəhid ailəsini belə balaca bir tikintiyə icazə vermək üçün az qala bir ildir ki, yollara salıb.

Bu yaxınlarda yolumuz İmişli rayonuna düşmüşdü. Gənclər Mərkəzini gördük. Qarşısında heç nə yazılmadığı üçün, sakinlərdən sözügedən binanın nəyin binası olduğunu soruşduq, sakinlər "toyxana" cavabını verdi. Sən demə Gənclər Mərkəzinin fəaliyyəti sadəcə gənclərin toyuna şahidlik etməkdən ibarət imiş.

Camaatgözünə də olsa əksər rayonlarda İcra Hakimiyyətləri bütün özəl günlərdə Gənclər Mərkəzində tədbirlər təşkil edir, 5-10 nəfəri bir yerə yığırlar. Maraqlıdır ki, İmişli rayon İcra Hakimiyyətinin şəxsi səhifəsində bu kimi məlumatlara çox təsadüf hallarda rast gəlinir.

Bundan əlavə, sakinlər deyir "Vilyam Hacıyev hər gün çıxıb inzibati binanın qarşısındakı Heydər Əliyev adına istirahət parkında gəzişirdi. Elçin Rzayev gələndən hələ onu parkda, ümumiyyətlə cəmiyyət arasında görən olmayıb. Elə buna görədir ki, çalışanlar da əraziyə laqeyd yanaşırlar. Parkdakı çoxillik yaşıllıq ağacları baxımsızlıqdan quruyub, ağacların arasında bitən vəhşi alaq otları dizə çatır. Oturacaqların əksəriyyəti qırılıb, məhv olub və götürülüb. Qalan 2-3 oturacaq da taxtaları sınmış, bərbad vəziyyətdədir. Vaxtında boşaldılmayan zibil qablarının içində yandırılan zibil, həm zibil qablarını bərbad vəziyyətə salıb, həm də adına "istirahət parkı" deyilən ərazinin havasını zəhərləyir. Hələ bütün bunlar azmış kimi, parkın içi sahibsiz itlərin məskəninə çevrilib. Bu sahibsiz itlər üzündən günün günorta çağı böyüklər belə parkın içindən qorxa -qorxa keçir, o ki, qaldı uşaqlar orada əylənə.

Parkın gecə görüntüsü isə qaranlığa qərq olmuş vahiməsi ilə fantastik filmlərdə gördüyümüz paranormal hadisələrin cərəyan etdiyi ərazini xatırladır. Parkda cəmi 2-3 işıq yanır ki, sakinlərin sözlərinə görə həmin işıqlar da sakinlərin özü tərəfindən alınıb.

Yeri gəlmişkən, elə bugünlərdə digər saytlardan birində çalışan həmkarlarımızdan biri İmişli rayon İcra Hakimiyyətində gülməli vəziyyətlə üzləşib.

Belə ki, o sakinlərin şikayətləri əsasında İcra Hakimiyyəti binasına yaxınlaşıb, mövqe almaq istəyib. Ona başçının və müavinlərinin idarədə olmadığı cavabı verilib. Bundan sonra idarədə çalışanlardan özünü təqdim etməyən biri xanımın vəsiqəsinə baxıb və "Xanım, prezident administrasiyasından keçmədiyiniz üçün sizə fikir bildirə bilmərik. Özü də siz xanımsınız, ona görə hörmət edib, polis çağırmıram. Sizə görə deyirəm administrasiyadan keçməmiş heç yerə getməyin."

Həmkarımız da özünü həmin şəxsin sözlərinə inanmış kimi göstərib və susub. Bundan sonra həmin özünü "ağıllı və savadlı" hiss edən, əslində isə müstəqil mediadan zərrəcə anlayışı olmayan şəxs, xanıma eşitdirmək amacı ilə yanındakı digər işçi ilə söhbət etməyə başlayıb. "Bizdən kim narazı ola bilər ki? Bir dənə şəhid ailəsi bizdən narazı ola bilməz. Hamısına lazımi köməkliklər olunur."

Elə söhbətin bu yerində sahibini qorumağa çalışan həmin şəxsə xatırlatmaq üçün 44 günlük müharibədə sağlamlığını itirən qazi Nahid Şıxalıyevin və şəhid xanımı Adilə Babaşovanın öz dillərindən dedikləri və hələ də həllini tapmayan problemləri xatırlatmaq üçün bu videoları təkrar təqdim etməyi, özündən və "sahibi"ndən razı idarə işçisinin yaddaşını təzələməyi özümüzə borc bildik.







Yeri gəlmişkən, şəhid xanımı Babaşova Adilə Novruz qızının bildirdiyinə görə, tikinti aparmaq üçün İcra Hakimiyyətinin icazəsini ala bilmədiyi Xanhüseyn Bəylərov küçəsindəki həmin ərazi "setqa" çəpərə alınıb və orada yaşayan sakinlərdən biri onlara, "siz başçıdan şikayət etməyin, "kupça"nı (çıxarış) Aslandan istəyin, burda hamıya Aslan verib" deyib.

Adilə xanım sözügedən iş adamı Aslan Manafov ilə telefon əlaqəsi saxlayıb. Telefona cavab verən və özünü Aslanın köməkçisi kimi təqdim edən şəxs, "Hələ Nazim sizin sənədinizi verməyib? Nazim verməli idi axı. Yaxşı, qoy görüm " deyib, telefonu söndürüb.

Gördüyünüz kimi iş adamı ilə İcra Hakimiyyətinin məsul, eyni zamanda işi korrupsiyada olan işçisi Nazim Rəsulov vətəndaşları, özü də şəhid ailəsini "pas-pas topu" kimi bir-birilərinə ötürürlər.

İmişli rayonunda diqqət çəkən biznes sahələrindən biri də daş, çınqıl, qum karxanalarıdır. Özü də bu karxanaların demək olar hamısı yaşayış ərazisinin çox yaxınlığında, hətta bəziləri kəndlərin içində fəaliyyət göstərir. Hansı ki, hələ 2020-ci ildə müasir texnologiyalarla çalışmayan, standartlara cavab verməyən çox karxanaların fəaliyyətləri dayandırılmışdır. Biz bu karxanaların standartlarla Hansi formada uzlaşdıqlarını deyə bilmərik, lakin gözlə görünən köhnə avadanlıqları, havaya buraxdıqları tüstü və tozu gördüyümüz üçün, bu karxanaların müasir dövrlə yaxından -uzaqdan hər hansı bir əlaqəsinin olmadığını düşünürük.

Qeyd edək ki, karxanaların belə yuxarıda adlarını çəkdiyimiz şəxslərə, həmçinin İmişli rayon Yol İstismar İdarəsinin müdiri Şükür Astanova məxsus olduğu deyilir. Oysa ki, karxanaların istehsal etdiyi materialları daşıyan yük avtomobilləri karxanalara gedən bütün yolların bərbad vəziyyətə düşməsinə səbəb olurlar.

Ərazisinə görə çox da böyük olmayan İmişli rayonunda baş verən qanunsuzluqlar barəsində yazmağa sözlər tükənməsə də, oxucularımızı yormamaq üçün bu dəfəlik bu qədər deyirik.

Növbəti dəfə mövzuya qayıtdığımızda İmişli rayon Məşğulluq idarəsi, "DOST" mərkəzi və DSMF-da cərəyan edən qanunsuzluqlardan, hansı idarələrdə kimlərin himayə etdiyi kimsələrin dövlət büdcəsinə və sakinlərin cibinə hansı yollarla şərik çıxmasından bəhs edəcəyik.

Redaksiyamız hər kəsin söz haqqını tanıyır.

DogruXeber.az