AZ
RU
Millət vəkili milyonları necə qazanıb?
Bir müddət öncə Milli Məclisin deputatı Xanlar Fətiyevin biznesini ölkədən çıxarması ilə bağlı məlumat yayılmışdı
"Xeberinfo.com": Məlumata görə, deputat biznesinin gələcək taleyinin "qaranlıq" olduğunu düşünərək indidən milyonlarını ölkədən çıxarmağa cəhd edir. Məlumatla bağlı bəzi araşdırmalar apardıq. Doğrudan da, X.Fətiyevin biznes şəbəkəsinin olub-olmadığı barədə faktlarla yanaşı, onun kimliyi də maraq kəsb edir. İlk olaraq deptatın özü haqqında bilgilərlə tanış olaq:
Xanlar Fətiyev kimdir?
Milli Məclisin "dilsiz" deputatlarından sayılan Xanlar Fətiyev 15 yanvar 1972-ci ildə Bakı şəhərində doğulub. 1988-ci ildə Azərbaycan Memarlıq və İnşaat Universitetinin sənaye və mülki tikinti fakültəsinə daxil olub. İş fəaliyyətinə 1988-ci ildə "Azərtransqaz" nəzdində 2 saylı səyyar mexanikləşdirilmiş dəstədə fəhlə kimi başlayan deputat 1990-1991-ci illərdə "Betonçu" kooperativində iqtisadiyyat və istehsalat üzrə mühəndis, 1992-1994-cü illərdə isə həmin kooperativdə sədr vəzifəsində işləyib.
O, 1994-1997-ci illərdə "Elruz" kiçik müəssisəsində sədr, 1997-2003-cü illərdə "Avestas" firmasının baş direktoru, 2003-2004-cü illərdə "Aznur" MMC-nin baş direktoru vəzifələrində çalışıb. 2004-cü ildən bu günə kimi isə "Gəncə Avtomobil Zavodu" İstehsalat Birliyinin Müşahidə Şurasının sədri vəzifəsində işləyir. 39 saylı Kəpəz birinci (Gəncə) Seçki Dairəsindən Milli Məclisə deputat seçilib. Milli Məclisin təhlükəsizlik və müdafiə komitəsinin üzvüdür. Rəhbərlik etdiyi "Gəncə Avtomobil Zavodu" İstehsalat Birliyinin direktoru vəzifəsini Kamran Qılman oğlu Nəzərov, direktorun birinci müavi postunu Bağban Qoca oğlu Nəbiyev, direktor müavini vəzifələrini isə Şəhla Fərhad qızı Abdinova, Etibar Vilayət oğlu Qasımov, Amin Allahverdi oğlu Əliyev icra edir. Həmçinin Fətiyev Gəncə Futbol Federasiyasının sədridir.
Milyonları necə qazandı?
Məlumatlarda deputatın rəhbərlik etdiyi Gəncə Avtomobil Zavodunda MAZ 555102-223-600, MAZ 551605-271, MAZ 650108-270-011, MAZ 457043, MAZ 533605-222, MAZ 544005-030-030, MAZ 642208-232, MAZ 643008-070- 010, MAZ 651608-220-600, MAZ 953000-014 markalı yük maşınlarının, BELARUS 1221, BELARUS 132H, BELARUS 320, BELARUS 321, BELARUS 80.1, BELARUS 80X, BELARUS 82.1, BELARUS 892, BELARUS 921.3 markalı traktorların, eləcə də DEM-114, ESU-150, FRS-200M, KO-456-10, KO-456-16, KS-55727-1-11, M-21 x2s, MUP-320 və MUP-351 markalı xüsusi təyinatlı texnikaların baha qiymətə satıldığı vurğulanır. Bundan başqa, 1986-cı ildə əsası qoyulmuş “Gəncə Avtomobil Zavodu”nun sovetlər birliyinin dağılması nəticəsində tikintisinin yarımçıq qaldığını və yalnız 2004-cü ilin dekabrında işə düşdüyünü vurğulayan məlumatı mənbənin sözlərinə görə, deputat zavodun 35 hektar ərazisini də ucdantutma satıb. Onun haqqında yayılmış digər məlumatlarda isə bildirilir ki, deputat zavoda da çox ciddi maxinasiya hallarına yol verib.
Gəncədən "fayton gəlir", yoxsa milyon?..
"Xanlar Fətiyevin daha bir "keyfiyyəti" Kür çayından Gəncə Avtomobil Zavoduna, eləcə də Avtomobilçilər qəsəbəsinə gələn 10 kilometrlərlə iri diametrli dəmir boruların satılaraq mənimsənilməsi zamanı üzə çıxıb. Amma Gəncə Avtomobil Zavodu bu günə kimi ayrılan külli miqdarda investisiyaya baxmayaraq, müəssisə müstəqil olaraq heç bir maşın növü istehsal edə bilməyib. Ötən il ərzində zavodda 1000-ci traktor konveyerdən çıxsa da, "Aqrolizinq" ASC ilə aralarında bağlanmış 35 milyon manatlıq dəyərində 500 ədəd traktorun qiymətlərini süni olaraq şişirtməklə 10 milyondan çox vəsaitin mənimsənildiyi iddia olunur. Bundan başqa, qısa müddət ərzində Gəncədə traktor istehsalının artırılması Belarusdan gətirilmiş texniki hissələrin gömrük rüsumundan azad olması ilə izah edilir. Lakin ehtiyat hissələrinin ucuz başa gəlməsinə baxmayaraq, yığılan traktorun qiyməti 25-30 min manata satılır. Yəni Xanlar Fətiyev bu sahədə şəffaflığın olmamasından yararlanaraq külli miqdarda gəlir əldə etməyə müvəffəq olur. Yəqin ki, müvafiq dövlət qurumları tezliklə bu məsələyə aydınlıq gətirəcəklər", - deyə mənbə bildirir.
Bakıdakı biznesinin izi ilə...
İddia edilir ki, Xanlar Fətiyevin Gəncə şəhəri ilə yanaşı, Bakıda da biznes şəbəkəsi yarada bilib. Belə ki, onun paytaxtın Yasamal rayonunda bir neçə iri biznes obyekti var. Deputat olduğu müddətdə Bakıda özünə iri biznes strukturları qurmağa müvəffəq olan deputatın Yasamal və Nəsimi rayonlarında bir neçə apteki və digər obyektləri fəaliyyət göstərir: "Hələ bu azmış kimi, bu gün də şəhərdə yeni obyektlər də tikdirir. Bu isə sakinlərin ciddi narazılığına səbəb olur. Buna "Sovetski"də də şahid olduq. Çünki Xanlar Fətiyevin göstərişi əsasında aparılan tikinti işləri "Sovetski" sakinlərini evlərindən didərgin düşməyə məcbur etdi. Ona bu işdə Yasamal Rayon İcra Hakimiyyətinin də köməyi az dəymədi".
Onu kimlər himayə edir?
Mənbə bildirir ki, Fətiyev ötən ilin aprel ayında Milli Məclis Aparatının Ümumi şöbəsinin müdiri Təlatüm Quliyevlə qohum olub. Kürkəni Böyükağa Quliyev isə AZAL Dövlət Konsernində işləyir. Bundan əlavə, mənbə iddia edir ki, deputat hər yerdə Baş nazir Artur Rasizadə ilə də yaxın qohumluq əlaqələrinə malik olduğu deyir. Gəncə Atomobil Zavodunun rəhbəri olmasını da bununla izah edir. Bu informasiyanın da nə dərəcə doğru olub-olmadığı bir tərəfə, deputatın Azərbaycan Respublikasının Konstitusiyasını pozaraq, biznesmenə çevrilməsi ciddi suallar ortaya qoyur. Çünki qanunda deputatın biznes fəaliyyəti ilə məşğul olması birmənalı olaraq qadağandır. Maraqlıdır ki, Fətiyevə bu qadağanı pozmağa kim səlahiyyət verib?
Pullarını niyə ölkədən çıxarır?
Məlumatda vurğulanır ki, Fətiyevin deputat olduğu bu müddət ərzində bircə dəfə olsun parlamentin iclaslarında çıxış etməməsi seşçiciləri tərəfindən həmişə qınaqla qarşılanıb. Maraqlıdır, görəsən, deputat niyə danışmır? Məgər, onun mətbuat vasitəsilə seçicilərinə, ictimaiyyətə, geniş auditoriyaya deyəcək sözü yoxdurmu? Yoxdur, çünki deputatı seçicilərinin problemi deyil, sahib olduğu milyonların gələcək taleyi düşündürür. Mətbuatda ise Fətiyevin bir neçə açıqlamasına rast gəlmək olar ki, bu da "Gəncə Avtomobil Zavodu" İstehsalat Birliyi və "Kəpəz" futbol klubu ilə bağlıdır. Bu məsələ onun üçün daha çox önəm daşıyır. Ona görə də biznesinin və əldə etdiyi milyonların gələcək taleyi onu daha çox narahat edir. Cari ildə Milli Məclisə seçilə bilməmək ehtimalı isə biznesmen deputatı pullarını ölkədən çıxarmaq məcburiyyətində qoyub. Görəsən, onun bu cəhdlərinə imkan veriləcəkmi?..
Araşdırmalarımız davam edir, yazıda adı çəkilən şəxslərin və depuatın da mövqeyini dərc etməyə hazırıq.
Arqument.Az
