Məlum olduğu kimi, “Terrorsuz Türkiyə” siyasi prosesinin gedişində PKK terror təşkilatı 47 ildən sonra bu gün silahı təhvil verib. PKK-çıların tərksilah olmasının ilk görüntüləri yayımlanıb. Bununla bağlı ilk açıqlama Türkiyənin Ədalət və İnkişaf Partiyasının (AKP) sözçüsü Ömer Çelikdən gəlib.

Yenixeber.org: Bu barədə o, “X” hesabında yazıb. 

Paylaşımda bildirilib: “Terrordan azad Türkiyə” məqsədinə uyğun olaraq PKK-nın silahlarının məhv edilməsi/təslim edilməsi prosesində ilk addım atıldı. Cənab Dövlət Baxçalının tarixi çağırışı və dövlət başçımızın göstərdiyi dövlət iradəsi ilə Türkiyənin terror yükündən qurtulmasında tarixi səhifə açmaq əzmi güclənir. “Terrorsuz Türkiyə” məqsədinə nail olmaq ölkəmizin terror yükündən xilas olmasını və yaxın bölgəmizin “terrordan azad zona” hədəfinə çatmasını təmin edəcək.

DEM Partiyasının tərəflər arasında həyata keçirdiyi səfərlər və məsləhətləşmələr prosesin məqsədlərinə çatmaq üçün göstərdiyi həssaslıqla yanaşı, əhəmiyyətli dərəcədə töhfə verməkdədir. Böyük Millət Məclisinin prosesə dəstək iradəsinin həyata keçirilməsi ilə TBMM-dəki bütün siyasi partiyaların töhfələri konkret olacaq.

Möhtərəm Prezidentimizin tapşırığı ilə dövlət qurumları “terrordan azad Türkiyə” məqsədinə nail olmaq üçün bütün sahələrdə, o cümlədən diplomatiya, kəşfiyyat, təhlükəsizlik sahələrində hərtərəfli səylərini davam etdirir”. 

Xatırladaq ki, bu günə qədər onminlərlə insanın ölümünə səbəb olan PKK terror təşkilatı 27 noyabr 1978-ci ildə Diyarbəkirin Lice rayonunun Fis kəndində qurulub. Təşkilatın ilk hücumu 1984-cü il avqustun 15-i axşam saatlarında Siirtin Eruh və Hakkarinin Şəmdinli rayonlarında həyata keçirilmiş, nəticədə 1 əsgər şəhid olmuş, 9 əsgər və 3 mülki şəxs yaralanmışdı.