Rusiya Federasiyası Dağıstan Respublikasının paytaxtı Mahaçqalada baş verən partlayış Rusiyada son 2 il ərzində ən ölümcül fövqəladə hadisə olaraq tarixə düşüb. 

Yenixeber.org:Rusiya Fövqəladə Hallar Nazirliyinin son məlumatına görə, Mahaçqalada yanacaqdoldurma məntəqəsində baş verən partlayış nəticəsində 35 nəfər ölüb. 

Bu, ən azı 2021-ci ilin noyabrında Kemerovo vilayətindəki Listvyajnaya mədənində partlayış baş verəndən bəri fövqəladə hal qurbanların sayı baxımından ən kütləvi hadisədir. 25 noyabr 2021-ci ildə metan partlayışı nəticəsində mədəndə 46 şaxtaçı və 5 xilasedici həlak olub. Bu ilin iyulunda şaxtanın keçmiş direktoru Sergey Maxrakov 2 il müddətinə azadlıqdan məhrum edilib. O, mədəndə yoxlamalardan yayınmaq üçün "Rostexnadzor" müfəttişlərinə rüşvət verməkdə təqsirli bilinib. 

Son 2 ildə Rusiyada baş verən digər böyük fövqəladə hallara nəzər yetirək: 

1. 21 aprel 2022-ci il tarixində Aerokosmik Müdafiə Qoşunlarının Mərkəzi Elmi-Tədqiqat İnstitutunun binasında yanğın baş verib. Nəticədə 22 nəfər ölüb. 

2. 2022-ci ilin sentyabrında İjevskdə 88 saylı məktəbdə baş verən atışmada daha 19 nəfər (hadisəni törədən şəxs də daxil olmaqla) həlak olub. Müəssisənin keçmiş tələbəsi Artyom Kazantsev 2 tapança ilə 11 uşaq və 6 işçiyə atəş açıb, daha sonra isə intihar edib. 

3. 23 dekabr 2022-ci ildə Kemerovoda qocalar evində yanğın olub. 22 nəfər də bu hadisədə həyatını itirib. 

Mahaçqalada partlayış avqustun 14-də axşam saatlarında “Nafta 24” yanacaqdoldurma məntəqəsində baş verib. Yanacaqdoldurma məntəqəsinin işçiləri yanğının əvvəlcə yaxınlıqda yerləşən avtomobil servisində baş verdiyini, daha sonra yanğının stansiyaya keçdiyini, daha sonra partlayışın baş verdiyini deyiblər. Nəticədə 35 nəfər həyatını itirib, qurbanların sayı durmadan artır. Son bir neçə saat ərzində onların sayı 30-dan 35 nəfərə çatıb. Ən azı daha 100 nəfər zərərçəkənlər siyahısındadır.