“Konstitusiya Məhkəməsinin xarici valyutada götürülmüş və “problemli kreditlər” adı ilə tanınan borclara görə, qəbul etdiyi qərar əsaslandırılmamış qərardır. Qərarın əsaslandırılması yetərli deyil”.

Yenixeber.org: Deputat Fazil Mustafa bunu Konstitusiya Məhkəməsinin Plenumunun xarici valyutada götürülən kreditlərlə bağlı bankların xeyrinə verdiyi qərarı şərh edərkən söyləyib.

F.Mustafa bildirib ki, Konstitusiya Məhkəməsi kredit götürülməsilə bağlı bağlanmış müqavilə şəraitinin dəyişmədiyi qənaətinə gəlib: “Amma 2015-ci ildə manatın iki dəfə devalvasiyaya uğraması, bunun əvəzində dolların iki dəfə bahalaşması kimi fakt var ortada. Bunun nəticəsində nə qədər iş adamı sıradan çıxıb, nə qədər əhali ağır borc şəraitinə düşüb. Bunları inkar etmək, bu qədərmi asandır?”

F.Mustafa hesab edir ki, həmin borcların bir hissəsi dövlət tərəfindən kompensasiya olunmalıdır, əks halda vətəndaşın hakimiyyətə güvəni azalacaq. “Bir daha təkrar edirəm ki, bu qərar tam əsaslandırılmayıb”, deputat bildirib.

Konstitusiya Məhkəməsinin Plenumunu xarici valyutada götürülən kreditlərlə bağlı bankların xeyrinə qərar verdiyi bildirilir.

AZƏRTAC xəbər verir ki, Konstitusiya Məhkəməsi Mülki Məcəllənin 422-ci maddəsinin şərh edilməsinə dair Bakı Apellyasiya Məhkəməsinin müraciəti əsasında işə baxıb.

Qərarda yazılıb ki, manatın xarici valyutalara nisbətdə məzənnəsinin dəyişməsinin tərəflərə gözlənilməz hesab edilmədiyini və borclunun krediti xarici valyutada almaqla maliyyə riskini öz üzərinə götürdüyünü nəzərə alaraq, manatın məzənnəsinin dəyişməsi şəraitin əhəmiyyətli dərəcədə dəyişməsi kimi qiymətləndirilə bilməz.

Xatırlatma

Konstitusiya Məhkəməsi bu məsələ ilə bağlı əvvəl də oxşar qərar verib. 2015-ci ilin mayında Konstitusiya Məhkəməsi qərara alıb ki, həmin il fevralın 21-dək, yəni manatın devalvasiyasına qədər hüquqi və fiziki şəxslərin xarici valyuta ilə götürdükləri kreditlər borcun qaytarıldığı anda mövcud məzənnə üzrə ödənilməlidir. Bununla da məhkəmə kreditin götürüldüyü məzənnə ilə qaytarılması ilə bağlı borcluların ümidlərinin üzərindən xətt çəkib. Həmin ilin dekabrında manat ikinci dəfə devalvasiyaya uğrayıb.

1 dollar birinci devalvasiyada 78 qəpikdən 1 manat 5 qəpik, ikinci devalvasiyada isə 1 manat 55 qəpik səviyyəsinə yüksəlib. Ancaq əsasən, son bir ildə manatın məzənnəsi sabit qalmaqdadır. Hazırda 1 ABŞ dolları 1 manat 70 qəpiyə bərabərdir.

Son rəsmi məlumatlara görə, Azərbaycan banklarında problemli kreditlərin həcmi 1,8 milyard manata yaxınlaşıb. (Azadliq.org)