Ermənistan Avropa İttifaqına üzvlük haqqında qanun layihəsini təsdiqlədi

Yenixeber.org: Ermənistan Parlamentində “Ermənistan Respublikasının Avropa İttifaqına üzvlük prosesinin başlanması haqqında” qanun layihəsi ikinci və yekun oxunuşda bəyənilib. "Ermənistan" müxalifət blokunun deputatı Armen Gevorqyanın qanun layihəsi ilə bağlı Avropa İttifaqının (Aİ) icra strukturlarından hər hansı rəsmi reaksiya olub-olmaması ilə bağlı sualına cavab olaraq xarici işlər nazirinin müavini Paruyr Ovannisyan deyib ki, Brüssel bu qanun layihəsinin ikinci oxunuşunu gözləyirdi: “Yalnız bundan sonra reaksiya verə biləcəklər”.

Müxalifətçi deputat isə o qədər də nikbin deyil. Onun fikrincə, siyasi bir qərar varsa, avropalılar o dəqiqə müsbət reaksiya verirlər və ya ümumiyyətlə heç bir reaksiya vermirlər.

2020-ci ildən, Rusiyanın “etibarını” görəndən sonra Ermənistanda tez-tez Aİ ilə daha da yaxınlaşmaq çağırışları çoxalıb. Bu məsələ ilə bağlı Paşinyanın komandası Avropa inteqrasiyası yoluna başlamağı həqiqətənmi istəyir? Unutmayaq ki, Ermənistan bu gün Avrasiya İqtisadi İttifaqı (Aİİ) Kremlin dəstəklədiyi birliyin tamhüquqlu üzvüdür. Bəs Avropanın özü necə, istisadiyyatı bərbad vəziyyətdə olan Ermənistana qucaq açmağa hazırdırmı?

            Suallarımızı tanınmış ekspertlər cavablandırıblar.

Azərbaycan Milli Məclisinin üzvü, politoloq Rasim Musabəyov:

“Bütün bunlar çox güman ki, təbliğat sferasındandır. Bəli, Avropaya inteqrasiya ilə bağlı qərarlar müxtəlif postsovet ölkələri tərəfindən verilir. Hətta bəziləri bunu öz konstitusiyalarına yazıblar - məsələn, Gürcüstan, Moldova, Ukrayna. Bəs sonda nə baş verir?

Yeri gəlmişkən, Ermənistan hələ də KTMT hərbi blokunun və Avrasiya İqtisadi İttifaqının üzvüdür. Bu, o deməkdir ki, Nikol Paşinyan hökuməti Avropaya inteqrasiya etmək niyyətini elan etməklə mahiyyət etibarilə öz vətəndaşlarına Avropa perspektivinin aktual olduğunu göstərmək istəyir. Baxmayaraq ki, reallıqda parlamentin bu qərarı heç nəyi dəyişmir.

Amma buna baxmayaraq, bu, yerli tamaşaçılar üçün müəyyən nümayiş rolunu oynayacaq. Eyni zamanda, İrəvanda hesab edirlər ki, bu qərar Avropa İttifaqından əlavə maliyyə dəstəyi almağa imkan verəcək. Lakin hüquqi baxımdan Avropa İttifaqı ilə Ermənistan arasında münasibətlərdə parlamentin bu qəbildən olan qərarları heç nəyi dəyişmir”.

Rusiyalı politoloq, publisist, tarix elmləri doktoru, “North&Eastern Europe Research Political Center”in rəhbəri Aleksandr Sıtin:

“Avropa İttifaqının hazırda çoxlu narahatlığı var. Üstəlik, Ukrayna ilə bağlı Rusiyanın qorxusunun nə dərəcədə əsaslı olduğu aydın deyil. Ermənistanı Aİ-yə qəbul etməklə Rusiya ilə birbaşa qarşıdurmaya girmək vaxtsız olardı. Ermənistan da bunu başa düşməli və Rusiyanın zəiflədiyi, böhran vəziyyətinə düşdüyü situasiyanı gözləməyi bacarmalıdır.

Həddindən artıq sərt addımlar Ukraynada olduğu kimi Rusiyanın bu və ya digər formada Ermənistana təcavüzünə gətirib çıxara bilər. Bu, kimə lazımdır?

Mənim fikrimcə, Rusiyanın Cənubi Qafqaz regionunda mövqelərinin zəifləməsi kifayət qədərdir. Və son nəticədə kəmiyyətin keyfiyyətə çevrilməsi və qüvvələr balansının avrointeqrasiya tərəfdarlarının xeyrinə dəyişməsi, ümid edirəm ki, regionun digər respublikaları kimi Ermənistanı da Aİ və NATO-ya aparmalıdır. Amma indi bunu etmək tezdir və mən Türkiyədəki qeyri-sabitlik şəraitində hələlik bu yöndə heç bir addım atmazdım”.(AYNA)