Son günlər nəinki, ölkə mediasinin hətta bir çox xarici mətbuatın da diqqət mərkəzində olan əsas məsələlərdən biri Qarabağ səmasında erməni silahlı qüvvələrinə aid helikopterin vurulmasıdır.

"Xeberinfo.com": Məsələyə rəsmi Bakı öz mövqeyini sərt şəkildə bildirdi. Qarabağ Azərbaycan torpaqlarıdır və Azərbaycan burada hava məkanını istənilən uçuşlara bağlı elan edib. Bütün əlaqəli beynəlxalq təşkilatlar da bu barədə məlumatlandırılıb. Bu rəsmi Bakının mövqeyi idi. ATƏT-in Minsk Qrupunun üzvlərindən biri olan Rusiyanında mövqeyi hər kəs üçün maraqlı idi.

Azərbaycanın Rusiya Federasiyasındakı Fövqəladə və Səlahiyyətli səfiri Polad Bülbüloğlu ANS-ə məsələ ilə bağlı açıqlama verib:

"Məni bir az yandıran odur ki, biz hər dəfə bu həqiqəti sübut etməliyik. Bax adamı bu yandırır. Yəni bu göz qabağındadır. Xəritələrdə hər bir şey aydındır. Hamı bilir kim kimin torpağını işğal edib. Amma hamısı çalışırlar ki, onları da və bizi də incitməsinlər. Mən səfir olaraq çox sərt bəyanatlar vermişəm. Biz əlimizdən gələni burada edirik. Bu günlərdə biz politoloqlarla, ekspertlərlə görüşürük, Azərbaycanın mövqeyinin bir daha aydın sürətdə onlara çatdırırıq və deyirik. Hazırda bizim bütün diplomatlar səfərbər olub. Biz hamımız bu işlə məşğuluq. Və bu işi davam etdirmək lazımdır. Mən burda mətbuatda bəyan etmişəm ki, nə qədər Ermənistan ordusu Azərbaycan torpaqlarından çəkilməsə, o qədər biz bu işi davam etdirəcəyik”.