AZ
RU
.jpg)
Sabiq nazirlə Qubad İbadoğlunun korrupsiya mübahisəsi
Fikrət Yusifovun fikrincə, iqtisadçı siyasi ambisiyalarına görə, faktları təhrif edib, amma ona cavab da var
"Xeberinfo.com": “Ekonomiks” Beynəlxalq İqtisadi Araşdırmalar Birliyinin sədri Fikrət Yusifov İqtisadi Tədqiqatlar Mərkəzinin rəhbəri Qubad İbadoğlunun mətbuata “korrupsiya faktları” kimi təqdim etdiyi araşdırmaya münasibət bildirib. Qeyd edək ki, həmin yazıda Q.İbadoğlu 2008-2013-cü illər ərzində Azərbaycanın rəsmi orqanları tərəfindən 21,5 milyard dollarlıq idxalın hesaba alınmadığını iddia edib.
F.Yusifovun fikrincə, Q.İbadoğlu siyasi ambisiyalarına görə iqtisadi faktları təhrif edib: “Biz təşkilatımızın təqdimatında bəyan etdik ki, cəmiyyətə hər şeyi olduğu kimi deyəcəyik. Öz siyasi ambisiyaları naminə iqtisadi məlumatları hər vəchlə təhrif edənlər artıq bunu bilməlidirlər. Unutmasınlar ki, onların yazdıqlarını təkcə aldatmaq istədikləri sadə insanlar oxumur.
Bu ”təhlilləri" eyni zamanda həmin mövzuları peşəkar bilənlər da oxuyur. Qubad İbadoğlunun dünən mətbuatda dərc olunan dırnaqarası sensasiyalı təhlili insanları çaşdırmağa hesablanıb. Bu həm də Qərbdəki bəzi dairələrə ünvanlanmış “Mən Azərbaycandakı korrupsiya faktlarını görün necə açıqlayıb ictimaiyyətə çatdırıram” mesajıdır. Bu təhlildə məlumatların haradan götürülməsi barədə heç nə deyilmir. Müəllif abstrakt “ticarət tərəfdaşına” istinad edir...
Kimdir bu ticarət tərəfdaşı? Hansı təşkilat və ya müəssisədir bu funksiyanı yerinə yetirən “tərəf”? Bir həqiqət var: İnformasiya mənbəyi göstərilmədən aparılan hər hansı təhlil və ya araşdırma əslində plagiatlıqla bir səviyyədə dayanan bir işdir. Siz cəmiyyətə bu qədər ciddi bir mesaj verməyin məsuliyyətini dərk etməlisiniz. Ona görə də öz təhlilinizdə “ticarət tərəfdaşları” adlı mənbənin dəqiq göstərilməsinə borclu idiniz. Əgər dedikləriniz həqiqətdirsə, siz bunu nə üçün etməmisiniz? Nə üçün təhlilinizi guya cəmi 15 ölkənin məlumatları əsasında aparmısınız? Nə üçün bu təhlil 2013-cü ildə Azərbaycanın ticari əlaqələrdə olduğu 150-yə qədər ölkəni əhatə etməyib? Axı Azərbaycan Dövlət Statistika Komitəsinin internet saytında bütün bu məlumatlar var. Siz Azərbaycanın rəsmi statistik məlumatlarına istinadən 15 ölkə üzrə 6 ildə idxalın həcmini 37,4 milyard dollar göstərirsiniz. Halbuki rəsmi statistika ilə cəmi 10 ən böyük mal ixracatçısı 6 il ərzində Azərbaycana bundan daha çox - 40 milyarda yaxın mal ixrac etmişdir.
Sual olunur, kimi aldatmaq istəyirsiniz? Nə üçün mövcud rəsmi rəqəmləri belə təhrif edirsiniz?
Deməli, sizə təhlil deyil, sadəcə, cəmiyyətə və Qərbdəki dostlarınıza mümkün qədər daha böyük hay-küyə səbəb ola biləcək informasiya çatdırmaq lazımdı. Bu məqsədlə öz “təhlilinizdə” son 6 ildə 15 ölkə üzrə “qarşı tərəfin” verdiyi məlumatlarla bizim rəsmi statistika məlumatları arasında 21,58 mlyard dollarlıq bir “fərq” çıxarıb bunu özünüzə bayraq edirsiniz. Aydındır ki, bu məlumatların doğru-yalan olmasının sizin üçün heç bir əhəmiyyəti yoxdur. Dediyiniz güzgü metodu ilə idxalın vəziyyətini yoxlamaq sizin imkanlarınız xaricindədir. Belə olan halda cəmiyyətə təqdim etdiyiniz bu yalan informasiyalar kimə lazımdır? Yeri gəlmişkən, təkcə bu deyil, apardığınız bütün araşdırmalar qərəzli və birtərəflidir.
Onların müstəsna olaraq sizin siyasi ambisiyalarınıza xidmət etməyə yönəldiyi toxunduğunuz məsələləri dərindən bilən hər kəsə aydındır. Siz illərdir ki, bu yolu tutmusunuz və indi də bu yolu davam etdirirsiniz. Bunun əsil səbəbi isə odur ki, bu yalan, birtərəfli və qərəzli “araşdırmalarınıza” qarşı indiyə qədər layiqli cavab verən olmayıb. Siz düşünmüsünüz ki, əgər cəmiyyət bu yalanları qəbul edirsə, deməli, bu kursu “uğurla” davam etdirmək olar... Mən sizin savadsız olduğunuzu deyə bilmərəm. Ancaq sizin siyasi ambisiyalar naminə apardığınız birtərəfli və təbii ki, qərəzli “iqtisadi araşdırmalar” az-çox malik olduğunuz elminizi, biliyinizi də öz ayaqları altına alır. Ümid edirəm ki, bundan sonra aparacağınız araşdırmalar daha dəqiq mənbələrə və informasiyalara əsaslanacaq". (“Qaqfqazinfo.az”)
İqtisadi Tədqiqatlar Mərkəzinin rəhbəri Qubad İbadoğlu istiqlal.az-a açıqlamasında F.Yusifovun söylədiklərinə cavab verib: “Əgər daha geniş məlumata ehtiyac olarsa bir daha müraciət edə bilər. Tədqiqata cəlb edilən ölkələrin seçilməsində aşağıdakı meyarlar əsas götürülüb:
- Azərbaycanın xarici ticarətində, xüsusilə də idxal əməliyyatları üzrə əsas tərəfdaş ölkələr (İdxalda ilk onluq - Rusiya, Türkiyə, Almaniya, Ukrayna, Çin, Böyük Britaniya, ABŞ, Yaponiya, Fransa, Belarus);
- Azərbaycanla sərhəddə yerləşən, ancaq əsas ticarət tərəfdaşı olmayan ölkələr (Gürcüstan);
- Dünya xarici ticarət siyasətinə əhəmiyyətli təsiri olan ölkələr (ABŞ, Yaponiya və s.);
- İxracatı Azərbaycana oxşar olan, yəni xammaldan daha çox asılı olan ölkələr (Qazaxıstan və s.).
Bu meyarlar əsasında ekspertlər tərəfindən aşağıdakı 15 ölkə seçilib: Almaniya, Belarus, Çin, Macarıstan, Rusiya, Türkiyə, Gürcüstan, Ukrayna, ABŞ, Yaponiya, Böyük Britaniya, Qazaxıstan, İran, İtaliya, Koreya, İsrail, Fransa.
Tədqiqat nəticəsində seçilən və adı yuxarıda çəkilən ölkələrin rəsmi orqanlarından Azərbaycanla 2008-2013-cü illər ərzində qarşılıqlı xarici ticarət əlaqələri haqqında məlumatların toplanması məqsədilə aşağıdakı informasiya mənbələrindən istifadə olunub:
Seçilmiş ölkələrin əlaqədar rəsmi strukturlarının veb səhifələri; Beynəlxalq və regional təşkilatların (Dünya Ticarət Təşkilatı, Dünya Gömrük Təşkilatı, Avropa Birliyi, UN Comtrade, “Eurostat”, İƏİT, BVF, MDB Statistika Komitəsi, Gömrük Birliyi) müvafiq məlumatları; Azərbaycan Respublikası Dövlət Statistika Komitəsinin “Azərbaycanın xarici ticarət əlaqələri məcmuəsi-2010", Azərbaycan Respublikası Dövlət Gömrük Komitəsinin Statistika və İnformasiya Texnologiyaları Baş İdarəsi, ”Gömrük xəbərləri" qəzeti, Mərkəzi Bankın bülletenləri, Tədiyə Balansı və s “.
