Fizuli rayonunun icra başçısı Alı Alıyev dünəndən etibarən iş otağını boşaltmağa başlayıb. 

Yenixeber.org: Redaksiyamıza verilən məlumata görə, icra başçısının belə bir addım atmasının səbəbi onu həmin vəzifəyə gətirilməsində dəstək vermiş iri çinli məmurun işdən çıxarılmasıdır.

Bildirilir ki, Alıyevin otağını boşaltması yaxın günlərdə vəzifəsindən gedəcəyi ilə bağlıdır. Məlumata görə, bu barədə Alı Alıyev özünün yaxınlarına da xəbər verib. Bildirib ki, onun bu posta təyinat almasında əsas rolu olan həmin iri çinli məmurun işdən çıxarılmasından sonra onun rayonda vəzifə başında qalıb-qalmayacağı sual altındadır. Hətta bu həftə içində işdən çıxarılması ilə bağlı sərəncam veriləcəyini də vurğulayıb.

Qeyd edək ki, Alı Alıyev uzun müddətdir Fizuli rayonuna rəhbərlik edir. Onun bu posta gətirilməsinin səbəbkarı isə Su və Meliorasiya ASC-nin sabiq sədri Əhməd Əhmədzadə olub. Belə ki, Əhmədzadənin ən etibarlı kadrlarından biri hesab olunan Alıyev, həm də sabiq sədrin biznesinin bir hissəsini idarə edirmiş. Redaksiyamıza verilən məlumatda deyilir ki, Haramı düzündə Əhmədzadəyə məxsus böyük heyvandarlıq kompleksi, habelə geniş əkin sahələri var. Həmin əkin sahələrinin əkilib, becərilməsi, heyvanların saxlanılması prosesini isə məhz icra başçısı nəzarət edirmiş.(jamaz.info)