Macarıstandakı seçkilərin yeganə məğlubu Orban deyil: Tramp, avroskeptiklər, Putin və Si Cinpin də uduzdu

Yenixeberorg.com: Macarıstan hökumətinə 16 il rəhbərlik etmiş Macarıstanın Baş naziri Viktor Orban “Fidesz” Partiyasının parlament seçkilərində sarsıdıcı məğlubiyyətini etiraf etdi. Milli Seçki Komissiyasının ilkin nəticələri müxalifət “Tisza”nın lehinə seçicilər arasında böyük bir fərq olduğunu göstərdikdən sonra Orban dedi: "Seçki nəticələri hələ qəti deyil, lakin onlar aydın və göz qabağındadır. Bizim üçün nəticə ağrılı və birmənalıdır: bizə ölkəni idarə etməyə davam etmək imkanı verilmədi".

Demək olar ki, bütün səslər sayıldıqdan sonra, onun rəqibi Peter Madyar və onun “Tisza” Partiyası konstitusiya çoxluğuna - 199 yerlik parlamentdə 138 yerə sahib oldu. Bu, ona Macarıstanda islahat aparmaq üçün geniş səlahiyyətlər verəcək. Seçicilərə müraciət edən Madyar “Vişeqrad dördlüyü” çərçivəsində əməkdaşlığı yeniləmək və gücləndirmək və mümkünsə genişləndirmək planlarını açıqlayıb. Buna görə də, yeni Baş nazirin ilk səfəri Polşaya olmalıdır. Madyar daha sonra Vyana və Brüsselə səfər etməyi planlaşdırır.

Viktor Orbanın Macarıstan üçün gördüyü işlərdə həqiqətən unikal olan nədir? O ölkəsini bəşəriyyətin gələcəyini formalaşdıranlar üçün geosiyasi mübarizə meydanına çevirib. Buna görə də, Macarıstan seçkilərinə diqqət misli görünməmiş dərəcədə böyük idi. Onlar Brüsseldə, Vaşinqtonda, Kiyevdə və Pekində izlənildi. ABŞ vitse-prezidenti Cey.Di.Vens kampaniyada iştirak üçün Budapeştə uçdu, ABŞ Prezidenti Donald Tramp isə artıq sabiq olan Baş nazir Viktor Orbana dəstək olaraq boş vədlər verdi.

Eyni zamanda, Rusiyada Vladimir Putin Avropanın şərq cəbhəsindəki "dostunu" təxribatlar və siyasi strateqlərlə dəstəkləmək üçün əlindən gələni etdi. Budapeştin özündə isə Ukrayna Prezidenti Volodimir Zelenskinin portretləri hökumət əleyhinə təbliğatla küçələrə yapışdırılmışdı. Sanki bu seçkilər Macarıstanda deyil, müharibədən sonrakı Ukraynada keçirilirdi...

Lakin Avropa İttifaqı, Ukrayna və cəsarətlə deyə bilərəm ki, Macarıstan xalqı bu döyüşdə qalib gəldi. Avropa Komissiyasının sədri Ursula fon der Leyen sosial mediada "Macarıstan Avropanı seçib və İttifaq güclənir" deyə bəyan etdi. Ukrayna lideri Zelenski də Macarıstanı seçimi münasibətilə təbrik etdi və əlavə etdi ki, Ukrayna həmişə Avropadakı hər kəslə mehriban qonşuluq münasibətləri axtarıb və buna görə də Kiyev milyonlarla avropalı əməkdaşlığa və sabitliyə can atdığı bir vaxtda Budapeştlə əməkdaşlığı inkişaf etdirməyə hazırdır.

Eyni zamanda, bu seçkiləri Tramp, bütün təbəqələrdən olan avroskeptiklər, Putin və Si Cinpin uduzdu.

İndi Macarıstanın hörmətli siyasət yürütmək və öz gələcəyini bərpa etmək şansı var. Bu, populistlər və hər cür fırıldaqçılar üçün sarsıdıcı məğlubiyyət, eyni zamanda, sağlam düşüncəli insanların qələbəsidir.

Müəllif: Sergey Taran – Ukraynalı politoloq.

Mənbə: UNİAN

Tərcümə Ayna.az -a məxsusdur.