Yenixeber.org: Ermənistanın Baş naziri Nikol Paşinyan Qarabağla bağlı debat keçiriləcəyi təqdirdə ölkənin keçmiş prezidentləri – Levon Ter-Petrosyan, Robert Koçaryan və Serj Sarqsyanı “əzib keçəcəyini” vəd edib. Paşinyan parlamentdə hökumət saatı zamanı belə qalmaqallı bəyanat verib.

Baş nazir bəyan edib ki, üç sabiq prezident 2020-ci ildə Azərbaycanın qələbəsi ilə başa çatan müharibədəki məğlubiyyətin məsuliyyətini onun üzərinə atmağa çalışırlar. Amma o hesab edir ki, həmin məğlubiyyət artıq onun hakimiyyətə gəlməsindən əvvəl qaçılmaz olub.

Məhz bu səbəbdən Paşinyan keçmiş prezidentləri televiziyanın birbaşa canlı yayımında debata çağırdığını deyib. Ancaq onun sözlərinə görə, bu çağırışa onlardan heç biri cavab vermir, debatdan boyun qaçırırlar.

“Bu üç “fikir dahisi” deyir ki, bizim Paşinyanla danışmağa heç bir mövzumuz yoxdur. Amma sonra nə edirlər? Uşaqlarını, nəvələrini, kürəkənlərini, gəlinlərini mətbuat konfranslarına göndərirlər. Əgər danışmağa sözünüz yoxdursa, onda sakit olun, oturun yerinizdə. Mən sizinlə debat aparmayacağam – mən sizi əzib keçəcəm. Və oradan sizin siyasi meyitlərinizin qalıqlarını çıxaracaqlar. Bu hər üçünüzə aiddir! Bəsdir artıq millətin əsəbləri ilə oynadınız! Mən debat etməyəcəm, sizi tapdalayacam!” – deyə Paşinyan açıq və sərt şəkildə bildirib.

Qeyd edək ki, Paşinyan bu çıxışdan əvvəl “Qarabağ hərəkatı”nın davam etməməli olduğunu vurğulayıb.

Ən maraqlı məqam odur ki, Paşinyan siyasi rəqibləri sırasına təkcə Rusiyameylli revanşistlər saydığı Koçaryan və Sarqsyanı deyil, ölkənin ilk prezidenti Ter-Petrosyanı da əlavə edib. Halbuki, o özü, uzun illər boyu Levon Ter-Petrosyanın yaxın siyasi müttəfiqi olub. 

Ortaya sual çıxır: Paşinyanın bu qədər sərt danışmasına səbəb olan plan nədir? Doğrudanmı bu şəxsləri “əzib keçəcək” qədər gücə sahibdir? Əgər onun həqiqətən də bu imkanları varsa, nə üçün indiyə qədər siyasi rəqiblərini “tapdalamayıb”? Onu saxlayan nə olub?

Suallarımızı Şərqi Avropa üzrə tanınmış rusiyalı ekspert, “Azadlıq Radiosu”-nun  jurnalisti Vadim Dubnov cavablandırıb.

“Hesab edirəm ki, Paşinyanın bu çıxışı sırf seçkiqabağı xarakter daşıyır. Ermənistanda 2026-cı ildə keçiriləcək parlament seçkiləri yaxınlaşdıqca bu cür çıxışların sayının daha da artdığını görəcəyik”, – deyə ekspert bildirib.

Onun fikrincə, Paşinyanın hakimiyyətini fərqləndirən maraqlı xüsusiyyət ondan ibarətdir ki, baş nazir nə qədər düzgün fikirlər səsləndirsə də, məsələn, “iki üstəgəl iki dörd edir” desə də, ya da “azadlıq əsarətdən daha yaxşıdır” söyləsə də, bunlar bütün hallarda müəyyən qruplar tərəfindən qəzəblə qarşılanacaq.

“Paşinyandan bu fikirləri eşitmək istəmirlər. Əlbəttə ki, onun rəqibləri bu kartdan istifadə edəcəklər. Daim xatırladacaqlar ki, ölkəni milli fəlakətə sürükləmiş bir şəxs ümumiyyətlə heç nəyə, xüsusilə də hansısa “cəsarətli islahatlara” haqqı olmayan adamdır. Əlavə edəcəklər ki, əslində bu islahatların nə qədər cəsarətli, nə qədər islahat yönlü olduğu da sual altındadır və bu addımlar daha çox Paşinyanın şəxsi hakimiyyətini gücləndirməyə xidmət edir. Reallıqda da ortada nə konkret islahat var, nə də ciddi dəyişikliklər. Bunlar əsasən boş ritorikadan ibarətdir, təsirli görünməyə çalışan bəyanatlardır”, – deyə Dubnov vurğulayıb.

Bundan əlavə, ekspert qeyd edir ki, hazırda Paşinyan Avropaya inteqrasiya yolundakı addımlarını yavaşıdır, əvəzində isə Moskvada keçiriləcək qələbə paradında iştirak etməyə razılıq verir.

“Bu baxımdan onun rəqiblərinin hücumu və bu hücumlara sərt cavab verməsi də gözləniləndir. Çünki başqa cür cavab vermək mümkün deyil. Əgər Koçaryan və Sarqsyan kimi keçmiş rejimi təmsil edən əsas rəqiblərə qarşı bu sərtlik aydındırsa, Levon Ter-Petrosyana qarşı yönəlmiş hücum da məntiqlidir. Bu, bir növ “daxili” mübarizədir. Çünki Ter-Petrosyan və onun komandası Paşinyanın hədəflədiyi eyni siyasi meydanda fəaliyyət göstərirlər. Zaman keçdikcə onların yolları xeyli ayrılıb, siyasi mənzərə də əvvəllər olduğu kimi deyil – amma yenə də Ter-Petrosyan Paşinyan üçün öz siyasi “mühitindən” çıxmış rəqibdir. Məhz bu səbəbdən aralarındakı mübarizə daha sərt keçəcək.

Düşünmürəm ki, Paşinyanın əlində öz rəqiblərini “tapdalamaq” üçün real, ciddi arqumentlər var. Hətta bir vaxtlar böyük rezonans doğuran və guya Koçaryanın da razılaşdığı Meğrinin Qarabağla “dəyişdirilməsi” iddiası belə, uzunmüddətli effekt vermədi. Cəmiyyət artıq bununla maraqlanmır. Ona görə də, hesab edirəm ki, bu “tarixi çalarlar” daşıyan mübahisələrin seçki kampaniyasına ciddi təsiri olmayacaq. Əsas məsələ debatın, qarşıdurmanın özüdür – yəni polemikanın məzmunu yox, onun varlığı maraqlı olacaq”, – deyə Dubnov yekunlaşdırıb.(pressklub)

Rauf Orucov