Yenixeber.org: Bu, Nazirlər Kabinetinin 2017-ci ildə fəaliyyəti haqqında hesabatında əksini tapıb. 

Sənəddə qeyd olunub ki, 3 hərbi hissənin 1 zabit yeməkxanasının tikintisi başa çatdırılaraq istismara verilib. Bundan başqa, zabitlərin mənzil-məişət şəraitinin yaxşılaşdırılması məqsədilə 123 mənzildən ibarət 6 ədəd yaşayış binası tikilib. Hazırda 1 hərbi şəhərciyin, 1 hərbi hissə və sursat anbarlarının, 1 hərbi hissənin, 1 yanacaq-sürtkü materialları bazasının, 2 ədəd avtomobil saxlancının, 10 post-qaravul məntəqəsinin və 2 ədəd silah-sursat anbarının tikintisi davam etdirilir. 

Hesabata əsasən, 1 yeni şəhərciyin və 1 hərbi hospital kompleksinin tikintisinin başlanmasına hazırlıq işləri aparılır. Gəncə və Naxçıvan şəhərlərində, Ələt qəsəbəsində ən müasir tələblərə uyğun yeni hərbi hospitalların, Məhkəmə-Tibbi Ekspertiza və Patoloji Anatomiya Mərkəzinin tikintisi aparılır. 

Bildirilib ki, 2017-ci ilin iyununda Azərbaycan Prezidentinin iştirakı ilə Şirvan şəhərində 4 növ qumbaralı atəş yığımlarının istehsalı zavodlarının açılış mərasimi keçirilib. Yaxın zamanlarda daha 2 zavodun - artilleriya və tank topları üçün müxtəlif çaplı mərmilərin isti ştamplanması və mexaniki emalı və həmin mərmilərin atəş yığımlarının gilizlərinin istehsalı zavodlarının açılışı nəzərdə tutulur.

Hesabat dövründə korrupsiya ilə əlaqədar hüquqpozmalara dair daxil olmuş vətəndaş müraciətləri əsasında aparılan araşdırmalar nəticəsində təsdiqini tapan 19 hal üzrə materiallar hüquq mühafizə orqanlarına verilib.