Mixal Pur

“İnfo.cz”, Çex Respublikası, 30.03. 2020

Yenixeber.org: Avropa Birliyi (AB) liderlərinin pandemiya zamanı keçirdikləri sammit tam məyusluqla başa çatdı. Onların ən mühüm məsələlərlə bağlı fikirləri diametral şəkildə bir-birinə əks oldu. Bu arada, rus və çinli epidemioloqların Avropada ortaya çıxması faktı da Avropa Birliyinin çarəsizliyinin nəticəsidir.

Liderlərin bu sammiti AB-nin hətta koronavirus böhranı zamanı birlikdə olduğunu təsdiq etmək məqsədilə planlaşdırılmışdı. Ancaq bunun yerinə, sammit mübahisələrlə və məyusluqla başa çatdı.

Bu durum, əslində, AB-nin şimalı və cənubu arasında müxtəlif baxışlar və digər fərqlər üzündən artıq çoxdan yaranıb. Və nəticəsi nə oldu? Bəlkə də ən pisi oldu. AB ölkələrinin liderləri iki həftədən sonra yenidən danışıqlar aparacaqlar. Hadisələrin mövcud inkişafı nəzərə alınarsa, danışıqlar çox uzun çəkəcək.

Elə sahələr var ki, orada baş nazirlərin və prezidentlərin mövqeyi yaxınlaşır, lakin ən mühüm məsələlərlə əlaqədar onların mövqeyi bir-birinə diametral əks olur. Söhbət mövcud böhran şəraitində avrozonada qaçılmaz olan zərərlərin minimal səviyyəyə endirilməsi məqsədilə istifadə oluna biləcək, necə deyərlər, koronavirus istiqrazlarından gedir.

Ən çox zərər çəkən ölkələr olan İtaliya və İspaniya artıq çoxdan borclanıblar və avrozona bir dəfə onları xilas etməli olub. Sadə desək, bu durum zəngin şimalın yoxsul cənuba görə ödəməli olduğunu göstərir. Bu, ilk öncə büdcə məsuliyyətinin birinci sıraya qoyulduğu Almaniyanın xoşuna gəlmir.

Amma alman yanaşması İtaliya Baş naziri Cuzeppe Konteni qəzəbləndirdi. O, böhrandan adekvat çıxış yolu tapması üçün Brüsselə 10 gün vaxt verdi. “Politiko”-nun xəbərinə görə, qəzəbli italyanı koronavirusun əfv etmədiyi İspaniya qızğın şəkildə dəstəklədi. Nəhayət, onların sözləri 3 saatlıq sözlü atışmaya səbəb oldu və AB liderləri, doğrusu, məzmunsuz olan bir mətni çətinliklə razılaşdıra bildilər.

Kimsə etiraz edə bilər ki, son günlər üzv ölkələr, bir az olsa da, özlərinə gəliblər, ticarət əngəllərini tədricən aradan qaldırmağa başlayıblar, bəziləri isə real olaraq bir-birinə kömək etməyə başlayıblar. Lakin AB Komissiyasının ilkin reaksiyasının yavaş və ləng, görülən tədbirlərin xaotik olması, həmrəyliyin isə kölgəsinin belə görünməməsi faktını inkar etmək, çətin ki, mümkün olsun. İndi ən aydın olan şeylər məhz bunlardır.

Əlbəttə, böhrandan çıxmaq üçün maliyyə alətlərinin yaradılması mürəkkəb iş ola bilər, lakin bu, kifayət qədər sürətlə dibə bata biləcək adamların vecinə deyil. AB-nin şimalı və cənubu arasında hələ də yalnız iqtisadi sahədə deyil, ideya sahəsində də aşılmaz fərqlərin mövcud olması da onları maraqlandırmır. Bəli, baş nazirlər və prezidentlər yekunda birgə bəyanatı razılaşdırdılar. Nə olsun? Bunun nə effekti olacaq?

Siz rus hərbçilərinin “humanitar” yardım çərçivəsində İtaliyaya necə çıxarıldığını, çin “ekspertləri”nin isə hara mümkündürsə getdiyini yenidən gördükdə, dərk edəcəksiniz ki, bu, dünya miqyaslı bir sui-qəsd deyildir. Bu, sadəcə olaraq Avropanın çarəsizliyinin və AB müqavilələrində haqqında çox yazılan həmrəyliyin olmamasının nəticəsidir. Artıq AB-nin hər iki ayağı axsayır, Rusiya və Çin isə yaranmış vəziyyətdən istifadə edir. Onlar üçün bu, bizim üzümüzə ucuz yolla tüpürmək vasitəsidir. Lakin günahkar olan bizim özümüzük.

Tərcümə: Strateq.az