Türkiyədə müxalifətin "Millət İttifaqı"na daxil olan Meral Akşenerin sədrlik etdiyi İYİ Partiya və Ali Babacanın rəhbəri olduğu DEVA Partiyası arasında qalmaqal yaşanıb. 

Yenixeber.org:Babacanın müavini Mehmet Emin Ekmen İYİ Partiyanın ittifaq daxilində ayrıca proporsional siyahı ilə parlament seçkilərini getməsini tənqid edib. 

O, İYİ Partiyanın digər partiyalarla birlikdə vahid siyahı ilə seçkilərdə iştiraka qarşı çıxmasının və mövqeyində israr etməsinin müxalifətə 15-20 deputat yerini itirmək bahasına başa gəldiyini vurğulayıb. 

Ekmenə cavab verən Akşenerin müavini Metin Ergun isə DEVA Partiyasının ittifaqa gözlənilən qədər töhfə vermədiyinə diqqət çəkib: "Sözünüzün çoxluğu qədər səsləriniz də olsaydı, seçkilərin nəticələrini dəyişərdi". 

Qeyd edək ki, dünən İYİ Partiyanın baş katibi Uğur Poyraz "Millət İttifaqı"nın bitdiyini açıqlamışdı. 

Xatırladaq ki, "Millət İttifaqı"na daxil olan partiyalardan Cümhuriyyət Xalq Partiyası, Səadət Partiyası, Gələcək Partiyası, Demokrat Partiya və DEVA Partiyası CHP loqosu altında vahid proporsional siyahı ilə, İYİ Partiya isə müstəqil siyahı ilə parlament seçkilərində iştirak etmişdi. Nəticələrə görə, CHP siyahısından 169, İYİ Partiyanın siyahısından isə 43 deputat seçilib.