Martin Şirdevan əlavə edib ki, Almaniya hökumətində bu işə ciddi yanaşan birini görmək istərdim.

 “Yenixeber.org”  TASS-a istinadən məlumat verir ki, Almaniya Sol Partiyasının həmsədri Martin Şirdevan hesab edir ki, davamlı sülhü təmin etmək üçün Rusiya ilə qarşılıqlı əlaqənin yolunu tapmaq lazımdır.

Bazar günü nəşr olunan Der Spiegel-ə verdiyi müsahibədə o, deyib: “Əgər biz sabit dünya istəyiriksə, Rusiya ilə qarşılıqlı əlaqə qurmağın bir yolunu tapmalıyıq”. Siyasətçi əlavə edib ki, Almaniya hökumətində bu işə ciddi yanaşacaq birini görmək istərdim.

Eyni zamanda o qeyd edib ki, Avropa İttifaqı həm Rusiyadan, həm də ABŞ-dan müstəqil olmalıdır. Lakin onun sözlərinə görə, Ukrayna münaqişəsindən sonra da Rusiya Avropanın bir hissəsi olaraq qalacaq.

“Ona görə də siz müharibədən sonrakı nizam haqqında düşünməlisiniz” - deyən siyasətçi, indi bunu etməyin çətin olduğunu bildirib.

 “Biz həmçinin NATO-dan kənarda təhlükəsizliyi müəyyən etməliyik. Aİ-nin ən böyük iqtisadiyyatı olan Almaniya təcili olaraq avropalı tərəfdaşları ilə Avropanın təhlükəsizliyini təkbaşına necə təmin edəcəyini müzakirə etməlidir”, - deyə, Şirdevan sözünü yekunlaşdırıb.

Tərcümə etdi: Səadət Sultan