Ermənistanın baş naziri Nikol Paşinyan ABŞ Konqresinin Nümayəndələr Palatasının Demokratik Tərəfdaşlıq Komitəsinin sədri Devid Praysın başçılıq etdiyi nümayəndə heyətini qəbul edib.
Yenixeber.org:Bu barədə Ermənistan hökumətinin mətbuat xidməti məlumat yayıb.
Tərəflər Qarabağ münaqişəsini və regional prosesləri müzakirə ediblər. Baş nazir nümayəndə heyətinin Ermənistana səfərini alqışlayıb və ölkədə demokratik islahatların ardıcıl həyata keçirilməsində Ermənistan-Amerika əməkdaşlığının əhəmiyyətini vurğulayıb.

"Ermənistan vətəndaşları birmənalı olaraq demokratiya yolunu seçiblər və Ermənistan hökuməti demokratik islahatların zəngin gündəmini qətiyyətlə davam etdirəcək. Son zamanlar intensiv erməni-amerikan təmasları, strateji dialoqlar və yüksək səviyyəli qarşılıqlı səfərlər Ermənistanın davamlı inkişafına mühüm töhfə verib”, - Paşinyan bildirib.
Öz növbəsində Prays müxtəlif sahələrdə əlaqələrin inkişafı və möhkəmləndirilməsi naminə sıx erməni-amerikan əməkdaşlığının genişləndirilməsinin vacibliyini vurğulayıb.
Paşinyan konqresmenlərə Azərbaycandan da şikayətlənib, sərhəddə baş verən sentyabr döyüşlərindən danışıb. O, ABŞ-dan adekvat reaksiya gözlədiyini bildirib. Eyni zamanda, Qarabağ ermənilərinin hüquqlarının qorunmasının vacibliyini qeyd edib.
Konqresmen Prays Azərbaycan əleyhinə fikirlər səsləndirib.