Yenixeber.org: Son illər Dövlət Başçısı İlham Əliyevin göstərişinə əsasən aparılan islahatların vəzifəsindən azad olunduqdan sonra "yastığının altından xəzinələr çıxan" məmurlara qarşı nə qədər ədalətli bir qərar olduğu bütün ölkəyə, eyni zamanda bütün məmurlara bir nümunə olacağına köklənmişdir. Lakin, təəssüflər olsun ki, hələ də bir çox vəzifə kürsülərində gözü seyfindən uzağı görməyən, sələflərinin aqibətini görməzdən gələn məmurlar fəaliyyətini davam etdirməkdədir. Oxucularımızı yormamaq üçün tək-tək nümunə göstərmək istəmirik. Yəqin ki, izləyicilərimiz bu kimi məmurların bir neçəsi ilə ötən yazılarımızdan xəbərdardırlar. Nə yazıq ki, ona verilən vəzifəni əcdadının vərəsəsi, idarəçiliyində olan ərazi sakinlərini isə "sadiq qulları" hesab edən "kiçik padşahlar"ın siyahısı hər gün artmaqda davam edir.

Problemlərini həll etmək üçün vəzifəyə təyin olunduğu sakinləri qəbul etməyən məmurlardan biri də son günlər adı "iş günü sərxoş halda ərazi gəzintisinə çıxmaq"da hallanan Ağdam rayon İcra Hakimiyyəti başçısı Vaqif Həsənovdur.

Redaksiyamıza müraciət edən Ağdam rayon Novruzlu kənd sakini, gənc xanım Quliyeva Samirə Sabir qızı bildirir ki, "üç azyaşlı övladım var, həyat yoldaşımdan ayrılmışam. Övladlarıma təkbaşına baxmaq məcburiyyətindəyəm. Nə aliment, nə ünvanlı sosial yardım almıram. İşsizəm. Ən kiçik övladım 8 aylıqdır. Onlara baxmaq üçün heç cür maddi imkanım yoxdur. Özüm də evim olmadığı üçün Bakı şəhərində kirayə yaşayıram. Mənə kömək etmələri üçün dəfələrlə Nazirlər kabinetinə, Qaçqın və Məcburi köçkünlərin işləri üzrə Dövlət komitəsinə, həmçinin sakini olduğum Ağdam rayon icra hakimiyyətinə müraciət etmişəm. Lakin, bu günə qədər heç bir qurumdan, heç bir köməklik göstərilməyib."

Yeri gəlmişkən onu da qeyd edək ki, aldığımız məlumata görə Vaqif Həsənovun oğlu Qaçqın və Məcburi Köçkünlərin işləri üzrə Dövlət Komitəsində sədr müavini vəzifəsində çalışır. Bu da onun sübutudur ki, digər yayımlanan yazılarımızda da qeyd etdiyimiz kimi vəzifəyə gələn məmurlar səlahiyyətlərinin yalnız qohum-əqrəbalarına "gün ağlamaq" olduğunu düşünürlər.

İdarəçiliyində olan rayon sakini Samirə Quliyeva kimilərinin isə hansı durumda olduğundan xəbərsizdirlər.
Yuxarıda da qeyd etdiyimiz kimi Samirə xanım Nazirlər kabinetinə, Qaçqın və Məcburi Köçkünlərin işləri üzrə Dövlət Komitəsinə də ünvanlı sosial yardım almasında ona hər hansı bir köməklik göstərmələri üçün müraciət edib. Əslində xanım ilk öncə yerli İcra orqanlarına müraciət etmiş və heç bir köməklik göstərilmədiyi üçün digər dövlət qurumlarına müraciət etmişdir. Nəzərə alsaq ki, xanımın tələbi o qədər də həll edilməsi mümkünsüz, yaxud uzun vaxt aparacaq bir bir proses deyil. Bu qədər zaman ərzində köməklik göstərilməməsi, xanımın digər dövlət qurumlarına müraciət etməyə məcbur qalması birbaşa Ağdam rayonunda fəaliyyət göstərən yerli İcra orqanlarının sakinlərə və sahib olduqları vəzifəyə məsuliyyətsiz yanaşmasından xəbər verir.
Redaksiyamız hər kəsin söz haqqını tanıyır.(DogruXeber.az)