“Azərbaycana üç istiqmətdə ciddi təsir gözlənilir”

"Xeberinfo.com":  Məlumata görə, bu sözləri Axar.az-a açıqlamasında iqtisadçı ekspert Natiq Cəfərli rublun dəyərdən düşməsinin Azərbaycana göstərə biləcəyi mümkün təsirlərindən danışarkən deyib.   İqtisadçı bidirib ki, rubl dəyərini kəskin itirdikcə bu, daha çox Rusiyadan gələn gəlirlər hesabına dolanan azərbaycanlı ailələrinin sosial rifahını aşağı salacaq:   “Rublun gün-gündən dəyərdən düşməsi Azərbaycana üç istiqamətdə təsir göstərəcək. İlk təsir ondan ibarətdir ki, Azərbaycan Dövlət Neft Fondunun yığımlarının, kiçik də olsa, bir hissəsi rublda yerləşdirilib. Təqribən yığımların 5 faizə yaxını rubl və lirədə saxlanılır. Dünyada rubl və lirə hazırda ən çox dəyər itirən valyutalardan biridir. Yəni rublun get-gedə daha da dəyərini itirməsi fondun az həcmdə də olsa bu valyutada yerləşdirilmiş yığımlarına təsir edəcək. İkinci istiqamət ondan ibarətdir ki, Rusiyada Neft Fondunun daşınmaz əmlak bazarında aktivliyi və bu bazara yatırımları var. Bu aktivlərin dəyərdən düşməsi baş verəcək. Üçüncü istiqamət isə Rusiyada yaşayan azərbaycanlılarla bağlıdır ki, gəlirlər azaldıqca, iqtisadi vəziyyət çətinləşdikcə və rubl dəyərdən düşdükcə, onların Azərbaycana göndərdikləri vəsaitin həcmi də kəskin azalacaq. Bu isə Azərbaycanda yaşayan və Rusiyadan gələn gəlirlərlə dolanan ailələrin sosial vəziyyətinə, alıcılıq qabiliyyətinə və həyat şəraitinə ciddi təsir göstərəcək”.