AZ
RU
"Vətənə gəl sən" - Təranə Şəms
Vətənə gəl sən
Deyirik bu dünya düzələn deyil,
Sən barı yaxşı ol düz, ələn deyir.
Doludur bu həyat yaramaz ilə,
Sağalmır dərdimiz yara, maz ilə.
Yolumuz qaranlıq, gözəl görünmür,
Kölgələr tozanaq göz, əl görünmür.
Odur ki, qum kimi ələn deyirəm,
Əyrisən, düz yola bələn deyirəm.
Cisimdə idrakın barını dərsən,
İrfani baxışın bir dünya olar.
Unutma, bu dünya fırlanmaz geri,
Düşüncən tozlanar, bir xülya olar.
Tələs ki, yolunda cığırın olsun,
Nəsildən, nəsilə bir işıq kimi.
Zil səslə bağır sən, çağırın olsun,
Boğma sən, səsini bir qısıq kimi.
Öndə get, çağır sən dəlibaşları,
Mən, mənəm deməyin faydası yoxdur.
Qoparın yerindən dəlidaşları,
Nahaqla döyüşün qaydası yoxdur.
Səsini qısarsan başın basılar,
Bağırsan eşitməz qeyri kimsələr.
Gücünlə görünsən adın asılar,
Bu sərvət sənindir, dadın kim bilər.
Bu xalqın balası nəroğlu, nərsən,
Atıl sən, meydana zəfər bizimdir.
Yolunu döndərib Vətənə gəl sən,
Bir olsa gücümüz təpər bizimdir.
.jpg)
