Azərbaycan Yazıçılar Birliyi (AYB) bir qrup müəllifi mükafatlandırıb.

Yenixeber.org: Bu barədə birliyin mətbuat katibi Xəyal Rza məlumat verib.

O bildirib ki, dövlət başçısının AYB-yə ayırdığı vəsaitin bir hissəsi bu mükafatların verilməsinə xərclənəcək.

“Bu il yubileyləri keçirilən İmadəddin Nəsimi, Cəlil Məmmədquluzadə, Cəfər Cabbarlı və İsmayıl Şıxlının adına 2000 (iki min) manat məbləğində 12 mükafat nəzərdə tutulur”, - Xəyal Rza deyib.

İmadəddin Nəsimi adına şeir mükafatlarına Musa Yaqub, Vaqif Bayatlı Odər və Firuzə Məmmədli, Cəlil Məmmədquluzadə adına nəsr mükafatlarına xalq yazıçısı Elçin Əfəndiyev, akademik Kamal Abdulla və xalq şairi Sabir Rüstəmxanlı, Cəfər Cabbarlı adına dramaturgiya mükafatlarına isə Firuz Mustafa, Vaqif Əlixanlı və Əjdər Ol layiq görülüb.

İsmayıl Şıxlı adına tənqid, ədəbiyyatşünaslıq və publisistika üzrə mükafatların laureatları professor Nizaməddin Şəmsizadə, “Azərbaycan” jurnalının baş redaktoru İntiqam Qasımzadə və tədqiqatçı Gülxani Pənahdır.

Gənc yazarlar üçün nəzərdə tutulan “Uğur” mükafatına isə Ümid Abbas Nihani, Rəvan Cavid, İntiqam Yaşar, Sərdar Amin və Əliəsgər Əhməd layiq görülüb. “Uğur” mükafatının məbləği 1000 (min) manatdır.