AZ
RU
.png)
Qara yaz dedim
Yolçuyam xəyala yenə yazıram,
Sökürəm qəlbimi al demək üçün.
Hazıram, gömməyə qəbir qazıram,
Sanma ki, yazıram qal demək üçün.
Titrəyən ürəyim, susan qəlbimdi,
Vəfasız birinə yanarmı könül?...
Mənə dözüm verən, yenə dərdimdi,
Dərd verən birini danarmı könül?...
Əhdinə dönüksə kimdən küsməli,
Xəyanət ovcunda bir içim sudur.
Mayaksız dənizdə nədən üzməli?...
Yatmışdım,ayıldım düz yolum budur.
Bu sevgi ucalıb, böyümədi heç,
Körpətək bələkdə səssiz ağladı.
Oxşanıb, nazlanıb öyülmədi heç,
Kimsəsiz, kimsəsiz kəssiz ağladı.
Yalvardım qəlbimə dərin qaz dedim,
Bu dadsız sevginin izi qalmasın.
“Vəfasız”,sözünü qara yaz dedim,
Bir daha meylini gülə salmasın.
Vəfasız, gülərək acıma gülə,
Çarəsiz özünsən dön özünə bax!...
Önümə aşiq tək çıxandan bəri,
A zalım qoydun ki, gül üzüm gülə?!...
Təranə Şəms.29. 03.2019
