AZ
RU
FİQUR OLMAYAQ…
"Xeberinfo.com":
Bu millət ölürsə , can verə bilmir.
Qan vurur başına, qan verə bilmir.
Yandırır özünü, yan deyə bilmir
Oyundu, oynayaq fiqur olmayaq!
Bu millət yatdıqca, gözü tox olur
Özünə, sözü çox, gözü yox olur.
Demə ki, yetimsən sığal çox olur
Oyundu, oynayaq fiqur olmayaq!
Analar bezibdi, lay-lay oxumur
İlməni tərs vurur, xalı toxumur.
Qan udan torpaq da, qanı qoxumur,
Oyundu, oynayaq fiqur olmayaq!
Ey Vətən balası, özünü gör sən
Alçalan mənliyin, izini gör sən
Tarixdən, keçmişin üzünü gör sən.
Oyundu, oynayaq fiqur olmayaq!
Unutma anadan, mərd doğulmuşuq
Düşmənə yağıyıq, dərd doğulmuşuq.
Biz çevik yalquzaq, cəld doğulmuşuq.
Oyundu, oynayaq fiqur olmayaq!
TƏRANƏ ŞƏMS.
