Yenixeber.org: Hərbi ekspert Ramil Məmmədli saytımıza açıqlamasında bildirdi ki, yaranmış vəziyyətdə silah bazarında Rusiya silahlarına maraq müəyyən dərəcədə azalacaq: 

"Rusiya istehsalı olan zirehli texnikanın alıcılıq imkanları bir qədər düşə bilər. Bu hal bir müddət özünü silah bazarında göstərəcək”.

Amma bununla belə, həmsöhbətimiz Qarabağda keçirilən hərbi əməliyyatlar fonunda rus silahlarının, Türkiyə və İsrail silahlarından ümumən geri qaldığı barədə fikirlərlə razılaşmadı:

"Bu məsələ ilə bağlı səslənən fikirlərin əleyhinəyəm. Hər bir hərbi texnikanın özünə məxsus təyinatı var. Məhz bu təyinata uyğun olaraq onlara qiymət verilir. Məsələn, Azərbaycanın malik olduğu reaktiv yaylım atəş sistemlərinə daxil olan silahlar arasında Rusiya istehsalı olan silah və artileriya qurğularının üstünlüyünü görərik. Rusiya istehsalı olan bu silahlar həmin sinfə aid olan İsraildən və Türkiyədən aldığımız silahlardan heç də geri qalmır. Zirehli texnikalara gəldikdə, Azərbaycanın arsenalında olan Rusiya istehsallı T-72 tankının ölkəmiz üçün rentabellik baxımından alternativi yoxdur”. 

R. Məmmədli düşünür ki, müasir texnologiya baxımından isə Azərbaycan üçün ən uyğunu İsrail və Türkiyədən alınan pilotsuz uçuş aparatları sinfinə aid olan hərbi məhsullardır:

"Məhz İsraildən alınan pilotsuz uçuş aparatları Azərbaycan Ordusuna böyük üstünlük qazandırdı. Bura Eron, Hermer, Harun, Kamikadze və "Arbitr”-2 pilotsuz uçuş aparatları daxildir”.

"Yəni Azərbaycan Ordusu bu müddət ərzində hərbi cəhətdən təchizatını balanslaşdırılmış əsasda qurdu. Ən müasir texnoloji hərbi silahları İsrail və Türkiyədən aldı, raket-artileriya sistemini gücləndirmək, hava hücumunu təkmilləşdirmək üçün isə Moskva ilə Təl-Əvivlə əməkdaşlıq etdi”, - deyə ekspert qeyd edib.