Moskva ilə Kiyev arasında Ukrayna üzərindən Avropaya neft göndərilməsinə dair razılaşmanın müddəti daha 10 il müddətinə uzadılıb.

Yenixeber.org: Bu barədə Ukraynanın Dövlət Neft Şirkətinin (Ukrtransnafta) açıqlamasında bildirilir. Şirkətin baş direktoru Nikolay Gavrilenko Rusiya Dövlət Neft Sərfiyyatı Şirkətinin (Transneft) direktor müavini Sergey Andronovla Kiyevdə müzakirələr aparıb. Tərəflər Ukrayna üzərindən neftin göndərilməsini nəzərdə tutan müqavilənin uzadılması haqda razılaşma imzalayıb.

Ukrtransnafta ilə Transneft arasında imzalanan razılaşmaya əsasən Ukrayna vasitəsilə neftin göndərilməsi haqda müqavilə daha 10 il işləyəcək.

Qeyd edək ki, iki dövlət şirkəti arasında yeni razılaşma neftin tranzit xidməti üçün ödəniş qiymətinə dəyişikliklər olmadan əldə edilib.

Xatırladaq ki, Rusiya və Ukrayna arasında neftin nəqlini nəzərdə tutan müqavilənin müddəti 2019-cu il dekabrın 31-də başa çatırdı. Hazırda Rusiya Ukraynadan keçən boru xətləri hesabına Şərqi Avropa ölkələrinə günlük 1,2 milyon barel neft satır.