Azərbaycan İslam Partiyasının sədri Mövsüm Səmədovun cəza müddəti daha 7 gün artırılıb

      "Xeberinfo.com": Sentyabrın 19-da yeni köçürüldüyü 12 saylı cəzaçəkmə müəssisəsində 5 gün müddətinə cərimə təcridxanasına (karsa) salındığını xəbər vermişdik. Sentyabrın 24-də Mövsüm Səmədovun “kars” müddəti başa çatdığı üçün AİP-in mətbuat xidməti 12 saylı cəzaçəkmə müəssisəsi ilə əlaqə saxlayaraq məsələ ilə maraqlanıb. Məlum olub ki, məhkumun cərimə təcridxanasındakı cəza müddəti daha 7 gün artırılıb.

Müəssisə rəsmisi müddətin artlrılması səbəblərinə aydınlıq gətirməyib.

      Mövsüm Səmədovun durumu ilə maraqlanmaq üçün təcridxanaya yollanan vəkil Anar Qasımlı onunla görüşə bilməyib. Vəkil azadxeber.az-a deyib ki, onunla görüş üçün digər müvəkkili Dəyanət Səmədov gətirilsə də, Mövsüm Səmədovu görüşə gətirməyiblər. Səbəb kimi isə AİP liderinin karserdə olmasını əsas gətirdilər: “Halbuki qanunvericiliyə görə məhbusun karserə salınması, onun vəkillə görüşə gətirilməsinə hər hansı bir formada maneə yaratmır. Çünki, karserdən görüşə gətirilən məhbus qaytarılaraq yenidən karserə aparılır. Lakin qanunvericiliyin bütün tələblərini xatırlatmağımıza baxmayaraq, bizə görüş üçün şərait yaratmadılar. Hətta Mövsüm Səmədovun yaxınların tərəfindən gətirilən yemək sovqatı da götürülmədi”.

      Sonda vəkil bildirdi ki, baş verənləri aydınlaşdırmaq üçün aidiyyəti qurumlara müraciət edəcəklər.