Azərbaycan Respublikası Gənclər Fondunun, Azərbaycan Respublikası Gənclər Təşkilatlarının Milli Şurasının və Gənclərin Antinarkomaniya İctimai Birliyinin birgə təşkilatçılığı ilə “Narkotikaya YOX de, öz həyatının qəhrəmanı ol” adlı maarifləndirici tədbir Lənkəran Tibb Kollecində uğurla baş tutub.

Tədbirin məqsədi gənclər arasında narkotik vasitələrin və psixoaktiv maddələrin fəsadları barədə maarifləndirmənin artırılması, sağlam həyat tərzinin təbliği və gənclərin zərərli vərdişlərdən uzaq durmasına dəstək olmaqdır.

Tədbir çərçivəsində çıxış edən natiqlər narkotik asılılığının insan sağlamlığına, psixoloji durumuna və sosial həyata vurduğu zərərlərdən bəhs edərək gəncləri düzgün seçim etməyə və öz gələcəklərinə məsuliyyətlə yanaşmağa çağırıblar. Qeyd olunub ki, antinarkomaniya ilə mübarizədə maarifləndirmə və profilaktik tədbirlər xüsusi əhəmiyyət daşıyır.

İnteraktiv formatda keçirilən görüş zamanı tələbələrin sualları cavablandırılıb, mövzu ətrafında müzakirələr aparılıb və gənclərin tədbirdə aktiv iştirakı təmin edilib.