Tədbirin məqsədi narkomaniya ilə mübarizənin gücləndirilməsi, gənclərin bu təhlükədən qorunması və sağlam həyat tərzinin təbliği olub.

Tədbiri açıq elan edən layihə rəhbəri Büllur Məmmədova narkomaniyanın cəmiyyətə və insan sağlamlığına vurduğu zərərlərdən bəhs edib. O, bu bəlanın yayılmasının qarşısının alınması istiqamətində həyata keçirilən dövlət siyasətini və 2019-2024-cü illəri əhatə edən Dövlət Proqramı haqqında gəncləri məlumatlandırıb. Layihə rəhbəri gənclərin maarifləndirilməsinin, sağlam və aktiv vətəndaşların yetişdirilməsinin önəmini vurğulayıb.

Tədbirdə dövlət qurumlarının nümayəndələri, ictimai fəallar və mütəxəssislər çıxış edərək narkomaniyanın sosial, iqtisadi və psixoloji fəsadlarından danışıblar. Onlar narkomaniyaya qarşı aparılan mübarizənin vacibliyini vurğulayaraq, bu istiqamətdəki tərəqqiyə dair son statistik göstəriciləri təqdim ediblər.

Tədbir interaktiv formada keçirilib, iştirakçı gənclərin sualları cavablandırılıb, maarifləndirici materiallar paylanılıb. Gənclərə narkotik vasitələrin yaratdığı təhlükələr haqqında praktiki məlumatlar verilib.

Tədbirin yekununda layihə təşkilatçıları bildiriblər ki, bu cür maarifləndirmə tədbirləri yalnız Masallı rayonu ilə məhdudlaşmır. Layihənin dəvamı olaraq, Azərbaycanın bir çox regionlarında analoji tədbirlərin keçirilməsi planlaşdırılır. Bu, daha çox gənci narkomaniya təhlükəsindən qorumaq və sağlam həyat tərzini təşviq etmək istiqamətində mühüm addımlardan biridir.

Masallıda keçirilən bu tədbir, gənclərin maarifləndirilməsi, onların narkotik vasitələrdən uzaq qalması və sağlam həyat tərzi haqqında biliklərinin artırılması baxımından mühüm rol oynadı.