Güney azərbaycanlı hüquq müdafiəçisi, Sülh üzrə Nobel mükafatı laureatı Nərgiz Məhəmmədi saxlanılıb. 

Yenixeber.org: Bu barədə Nərgiz Məhəmmədinin fondu “X” sosial şəbəkəsində məlumat yayıb. 

Onun İranda hüquq müdafiəçisi, vəkil Xosrov Əlikordinin anım mərasimində saxlanıldığı bildirilir. 

Nərgiz Məhəmmədidən başqa Məşhəd şəhərində daha bir neçə fəal da saxlanılıb. Onların saxlanılma səbəbi açıqlanmır. İran hakimiyyəti isə xəbərləri şərh etməyib.

Qeyd edək ki, Nərgiz Məhəmmədi 1972-ci ildə Güney Azərbaycanın Zəncan şəhərində anadan olub. O, insan hüquqlarının müdafiəsi ilə bağlı apardığı fəaliyyətlərinə görə ümumilikdə 36 il müddətinə azadlıqdan məhrum edilib, bunun 10 ilini həbsxanada çəkib. 2024-cü ilin dekabrında ona səhhətinə görə 21 günlük məzuniyyət verilib, sonra bu müddət daha altı ay uzadılıb.

O, “qadınlara qarşı zorakılıqla mübarizəsinə”, eləcə də “hər kəs üçün insan hüquqları və azadlığının təşviqi uğrunda apardığı mübarizəyə” görə 2023-cü ildə Sülh üzrə Nobel mükafatına layiq görülüb.