Ermənistanın Baş naziri Nikol Paşinyanla ölkənin dini rəhbərliyi arasındakı gərginlik yeni mərhələyə keçib.

Yenixeber.org: "Armenia Daily" nəşrinin məlumatına görə, hökumət Atys dağında ucaldılması planlaşdırılan nəhəng İsa Məsih heykəlinin tikintisinə qadağa qoyub.

Məlumata görə, Paşinyan layihənin əsas sponsoru olan müxalif “Çiçəklənən Ermənistan” Partiyasının lideri Qaqik Tsarukyana qarşı məhkəmə iddiası qaldırıb. Tsarukyan “torpaqdan təyinatına uyğun olmayan şəkildə istifadə etməkdə” ittiham olunur.

Qeyd olunur ki, hökumət layihə ilkin olaraq təsdiqlənərkən məsələ ilə bağlı rəsmi açıqlama verməyib. Lakin tikintinin dayandırılması xristian icması tərəfindən Paşinyanla Ermənistan Apostol Kilsəsi arasında davam edən qarşıdurmanın növbəti epizodu kimi qiymətləndirilir.

Son aylarda onlarla keşişin “hökuməti devirməyə cəhd” ittihamı ilə həbs olunması da bu gərginliyin fonunda baş verib. Nəşr yazır ki, dünyanın ən hündür İsa Məsih heykəli kimi planlaşdırılan abidənin inşasının dayandırılması Paşinyanın təkcə kilsəyə deyil, həm də siyasi müxalifətə yönəlmiş açıq mesajıdır.